چہرے کاحسن وجمال اوراس کے مسائل

چہرے کاحسن وجمال اوراس کے مسائل

                                                                                                                                                                            انسانی جسم میں چہرے کو وہی حثیت حاصل ہے جو ایک پودے میں پھول کی ہوتی ہے۔چہرہ انسان کی شناخت ہی نہیں ، اس کی دلکشی اورجازبیت کامرکز بھی ہوتاہے۔تاہم بعض مسائل ایسے ہیں جو انسان کے چہرے کی رعنائی کو متاثر کرتے ہیں ۔ نوجوان لڑکے لڑکیاں بالخصوص ان مسائل کے ہاتھوں پریشان ہوتے ہیں۔اس عمر میں نوجوانوں کیلئے چہرہ ایسی دولت کی طرح ہوتاہے جسے وہ کسی بخل کے بغیر دوسروں میں بانٹنا چاہتے ہیں  مگر جب  چہرہ دانوں اور غیرضروری بالوں سے بھر جائے یا چہرے کی رنگت خراب ہو جائے، تو انھیں یہی اثاثہ  لوگوں سے چھپانے کی فکر لگ جاتی ہے۔یہ چیزحساس نوجوانوں میں شرم، جھجک اوراحساسِ کمتری پیدا کرتی ہے۔اور انھیں آئینہ اپنا دشمن لگنے لگتاہے۔پھر یہ نوجوان بدحواس ہو کرانواع واقسام کی کریمیں،لوشنز اورپاؤڈر آزماتےہیں جواکثر صورتوں میں ناقص  اورغیرمستند ہونے کے سبب چہرے کی نازک جلد کو الٹا نقصان پہنچاتے ہیں۔

                                                                                                          ذیل میں ہم چہرے کے حوالے سے چند مسائل اور ان کے حل پر بات کریں گے:

کیل اورمہاسے

                                                                                                                                                         چہرے پر دانوں، کیل اورمہاسے اس وقت نمودار ہوتے ہیں جب جلد میں روغنی اجزا ء بڑھ کر بالوں کی  جڑوں میں پائی جانے والی تھیلیوں(Follicles) کو ڈھانپ لیتے ہیں  اور اس رکاوٹ کے پیش آجانے کی وجہ سے جلد پر سفید،سیاہ یاسرخ رنگ کے دانے ابھرآتےہیں۔یہ دانے پیپ سے بھرے ہوئے اورتکلیف کا باعث ہوتے ہیں۔یہ پیشانی اوررخساروں کے علاوہ سینے،کندھوں اوربالائی کمر پر بھی ہوسکتے ہیں۔

                                                                                                 کیل مہاسوں کے اسباب میں جسم میں روغنی مادوں کی کثرت، بالوں کی مردہ جڑیں، جراثیمی انفیکشنز اورمردانہ  ہارمون اینڈروجن کی زیادتی شامل ہیں۔یہ مسئلہ زیادہ تر نوجوانوں(ٹین ایجرز) کوپیش آتاہے ۔

زخم ،خارش اورانفیکشنز کی شدید صورتوں میں کسی ماہر امراضِ جلد (ڈرماٹولوجسٹ) سے رجوع کرنا چاہیئے جو اینٹی بایوٹکس اور اینٹی اینڈروجن دوائیں کھانے کیلئے تجویز کرے گا۔اس کے علاوہ بیرونی استعمال کیلئے جیل اورلوشنز بھی دیے جاتےہیں۔تاہم ان دواؤں کے سائیڈ ایفیکٹس بھی ہوتےہیں ، لہٰذا یہ علاج ہمیشہ کسی ماہر اورمستند معالج کی زیرِ نگرانی ہی کرنا چاہیئے۔ یہاں ہم آپ کو چند متبادل دوائیں (Alternative Medicines) بتارہے ہیں جو قدرتی نباتاتی اجزاء سے تیارشدہ ہونے کی وجہ سے بے ضرر اورمحفوظ ہیں اورجلد ی امراض کیلئے انتہائی مؤثر بھی ہیں:

1) صافی(ہمدرددواخانہ ،کراچی): یہ خون صاف کرنے والی قدرتی جڑی بوٹیوں سے تیارشدہ شربت ہے جوخون سے خراب مادوں کو خارج کرکے دانوں، کیلوں اورمہاسوں سے نجات دلاتاہے۔ اس کے علاوہ یہ اپنی سرد تاثیر کے باعث مردانہ ہارمون پیداکرنے والے غدودوں کے فعل کوبھی اعتدال پر لاتاہے جس سے جوانی کے دانوں اورپھنسیوں کی روک تھام ہوجاتی ہے۔اس کے استعمال کے دوران گرم،تیزمسالے دار اورچکنائی والی غذاؤں سے پرہیز ضروری ہے۔صافی کےدوچمچے ایک کپ پانی میں ملاکر صرف ایک بار رات سوتے وقت  پیئں۔

2) بیریسال شربت(ہمدرد دواخانہ، کراچی): یہ گھیگوار(ایلوویرا) کے گودے سے تیارکیا گیا شربت ہے۔ گھیکوار کاگودا جلد کیلئے بے شمار فوائد رکھتاہے۔یہ جسم سے غیرضروری اورمضرمادوں کو خارج کرکے جسم کی صفائی کرتاہے۔اینٹی بایوٹک اثرات کی وجہ سے جلدی انفیکشنز کے علاج میں معاون ہے اورمانع تکسید (اینٹی آکسیڈینٹ) خوبیوں کی وجہ سے چہرے کی جلد کی خرابی اورقبل ازوقت جھریاں پڑنے سے روکتاہے۔ اسی لیے ایلوویرا جیل بھی چہرے پر لگانے کیلئے تجویز کی جاتی ہے۔چہرے کی جلد کی تازگی اورخوبصورتی کیلئے بیریسال شربت کااستعمال بہت مفید ہوتاہے۔اس شربت کے چائے کے دوچمچے دن میں دوبار کھانے کے بعد استعمال کریں۔

3) ہیپارسلفورس پنٹارکن(Hepar Sulphuris Pentarkan No.53): یہ شوابے جرمنی کی ہومیوپیتھک دواہے۔ یہ ہر طرح کے کیل، مہاسوں اورپھنسیوں کیلئے انتہائی مفید گولیاں ہیں۔یہ جلد کے نیچے چکنائی اورچربی کی مقدارکو کم کرتی ہیں۔ دانوں میں پیپ کو چشک کرکے انفیکشن کاخاتمہ کرتی ہیں۔اس کے علاوہ جلد کی صحت میں اضافہ کرکے چہرے پرچمک اورنکھار پیداکرتی ہیں۔دو گولیا ں دن میں تین مرتبہ زبان پر رکھ کر چوسیں۔

4) بروکس سلفر کریم (Brooks Sulfur Cream): یہ بروکس ہومیو لیب کی تیارکردہ ہومیوپیتھک کریم ہے۔یہ چہرے پر نمودار ہونے والےکیل مہاسوں، پھوڑے پھنسیوں  ،پیپ دار دانوں  اورجلد کی سوزش اورخارش کیلئے مفید ہوتی ہے۔یہ کریم متاثرہ جگہ پر دن میں تین مرتبہ لگائیں۔

5) تھوجا کریم(Thuja Occ Cream):  یہ بھی  بروکس  ہومیو لیب کراچی کی تیارکردہ ہومیوپیتھک کریم ہے جو چہرے پر مسّوں اورگومڑوں کیلئے بہت مفید ہوتی ہے۔ اس کے استعمال سے مسّے اورگومڑ چہرے پر داغ چھوڑے بغیر نکل جاتےہیں اوردوبارہ نمودار نہیں ہوتے۔یہ کریم متاثرہ مقامات پر دن میں کئی مرتبہ لگائیں۔

چہرے کے غیرضروری بال

                                                                                                                                           چہرے پر اگنے والے غیرضروری بال خاص طورپر خواتین کیلئے پریشان کن ہوتے  ہیں۔ان کاسبب جسم میں مردانہ ہارمون اینڈروجن کی زیادتی ہوتی ہے۔ طبی زبان میں اس مسئلے کو Hirsutism کہا جاتاہے۔اس میں چہرے کے ان حصوں میں بال اگنے لگتےہیں جو عام طورپر مردوں کے ساتھ خاص ہوتے ہیں۔ایسے بال اگرچہ صحت کیلئے کوئی خطرہ نہیں ہوتے لیکن نوجوان لڑکیوں کیلئے احساسِ کمتری کاباعث بن جاتے ہیں۔

                                                                                                                                                 اس مسئلے کے تدارک کیلئے عام طورپر معالج اینٹی اینڈروجن اور مانع حمل  (Contraceptives)دوائیں دیتے  ہیں۔تاہم ان دواؤں کے سائیڈ ایفیکٹس بہت پریشان کن ہوتےہیں۔ یہاں متبادل ادویہ کے طور پر  ایک دوا کاذکر کیا جاتاہے جو غیرضروری بالوں سے نجات کیلئے مؤثر اورمحفوظ ثابت ہوئی ہے۔

اورنیٹک ٹیبلیٹس (Ornatic Tablets ): یہ شوابے جرمنی کی تیارکردہ ہومیوپیتھک گولیاں ہیں ۔ ان کاجزو الیم جیکورس(Oleum Jecoris) ہے جو مچھلی کے جگر  کے تیل سے حاصل کیا جاتاہے۔ یہ دوا چہرے اور جسم کے کسی بھی حصے میں پیداہونے والے غیرضروری  بالوں کیلئے بہت مفید ہوتی ہے۔ یہ گولیاں خواتین کے ہارمونی نظام کو اعتدال پر لاتی ہیں  اورغیرضروری بالوں کے تدارک کے علاوہ ماہانہ تکلیف اورحیض کے مسائل بھی دور کرتی ہیں۔ دو دو گولیاں دن میں دو مرتبہ کھانے سے پہلے چوسیں۔

کالی یا گہری سانولی رنگت کامسئلہ

                                                                                                                                           ہمارے ہاں گورے رنگ کو خوبصورتی کامعیار مانا جاتاہے ۔ بلکہ ایک قول کے مطابق، ”گورا رنگ آدھا حسن  ہوتاہے“۔ یہ بات کئی حوالوں سے درست نہیں ، مگر پھر بھی اس عمومی رجحان کے زیرِ اثر بہت سے مردوزن اپنی سیاہ یا سانولی رنگت پر شرمسار رہتے ہیں۔ اس معاملے میں قدرت کی کچھ حدود بھی ہیں مگر بعض تدابیر سے چہرے کی رنگت کو قدرے نکھارا جاسکتا ہے۔ ذیل میں ایسی قدرتی دواؤں کے نام دیے جارہے ہیں جو رنگ گورا کرنے کیلئے استعما ل کی جاسکتی ہیں:

1) بربیرس ایکوفولیم (Berberis Aquifolium Q): یہ ایک ہومیو پیتھک مدر ٹنکچر ہے جو رنگ گورا کرنے کیلئے بہت مفید پایا گیا ہے۔یہ مدرٹنکچر ان تمام صورتوں میں استعمال کیا جاسکتاہے جہاں چہرے کارنگ سیا ہ ہو یا داغ دھبوں اور مہا سوں کے نشانات کی وجہ سے رنگت خراب ہوچکی ہو۔یہ دوا چھ ماہ پابندی سے لینے سے چہرے کی رنگت گوری اوراجلی ہوجاتی ہے۔ سیاہی دور ہوکر چہرے کی جلد میں چمک  پیدا ہوجاتی ہے۔یہ دوا مصفئ خون بھی ہے ، اس لیے خون کوصاف کرکے کیل ، مہاسوں اوردانوں کاخاتمہ کرتی ہے۔

                                                                                                    اس کا ترکیب استعمال یوں ہےکہ اس مدرٹنکچر کے بیس قطرے آدھے کپ تازہ پانی میں ملاکر دن میں تین بار کھانوں سے آدھا گھنٹہ قبل پیئں۔ اس کے ساتھ ہی اس  مدر ٹنکچرکے بیس قطرے ، عرقِ گلاب کے بیس قطروں کے ساتھ ملا کر دن میں تین بار چہرے پر لگائیں۔بہتر ہوگا کہ یہ مدرٹنکچر شوابے جرمنی کا تیا رشدہ ہی استعما ل کیا جائے۔

2) عروسہ: یہ  اجمل دواخانہ لاہور کے قدیم  اورمجرب نسخے کے مطابق تیار کیا گیا ابٹن ہے جوخواتین سنگھار کیلئے استعما ل کرتی ہیں۔عروسہ جلد  کو ملائم رکھنے اور رنگت نکھارنے  والی جڑی بوٹیوں کا مرکب ہے۔جھائیوں ، مہاسوں اورداغ دھبوں کودور کرتی ہے۔ عروسہ کے استعمال سے چہرے کاحسن دوبالا ہوجاتاہے اورجلد میں بھینی بھینی اورسرورانگیز خوشبو بس جاتی ہے۔

                                                                                                                    بقدر ضرورت پانی میں ملاکر چہرے پر ملیں۔دس پندرہ منٹ بعد چہر ہ دھو لیں۔

****************************

 

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                             

خودترغیبی

خودترغیبی

                                                                                                                ہرانسان اپنی ذات کی گہرائیوں میں یہ احساس رکھتاہے کہ وہ ایک غیرمعمولی اورمنفرد صلاحیتوں کاحامل ہے اور ہر لحاظ سے زندگی میں بڑی کامیابیوں کا مستحق ہے۔ لیکن انسانوں کی اکثریت کو اس مایوس کن حقیقت کاسامنا کرنا پڑتاہےکہ قابلیت اور اہلیت کے باوجود وہ زندگی میں کوئی خاطرخواہ کامیابی حاصل نہ کرسکے۔

ناکامی کی وجہ

                                                                                                                                                           بہت کم لوگ ہی کیوں کامیاب رہتے ہیں؟ بہت کم لوگ ہی کیوں اپنی مخفی صلاحیتوں کو مادی  نتائج میں ڈھالنےمیں کیوں کامیاب ہوتے ہیں؟اس کی وجہ یہ نہیں کہ قدرت صرف چند لوگوں کو باصلاحیت پیداکرتی ہے  بلکہ اس کابڑا سبب یہ ہے کہ انسان کی اپنی نفسیات میں ایسی منفی قوتیں موجود ہوتی ہیں جو انسان کی کامیابی کے حصول میں زبردست مزاحمت کرتی ہیں۔

                                                                                                                                   انسان کے تقریباً نوے فیصد ذہنی اعمال ذہن کے ایک پوشیدہ اورپراسرار حصے میں وقوع پذیر ہوتے ہیں جس کی سرگرمیوں سے ہم شعوری طورپر بے خبر رہتے ہیں۔ اس حصے کو لاشعور کہا جاتاہے۔ یہی لا شعور حقیقت میں ہماری کامیابیوں اورناکامیوں کاذمہ دار ہوتاہے۔ہم جوزندگی میں اپنی واقعی صلاحیتوں سے بہت ہی کم حاصل کرپاتے ہیں تو اس کی وجہ یہ ہے کہ ہمارے ذہن کا لاشعوی حصہ بچپن کے ناخوشگوار ماحول، ناقص تربیت ، دوسروں کی تنقید اورزندگی کے سابقہ ناکام تجربات کی بنیادپر ہماری شخصیت کا ایک منفی اور حوصلہ شکن تصور مسلسل ہمارے شعوری ذہن کی طرف بھیجتارہتا ہے۔

                                                                                                                                                 جب آپ کالاشعور مایوسیوں، تلخیوں،خوف وخدشات اورشکست کوردہ خیالات سے بھرا ہواہے تو آپ محض شعوری سطح پر مثبت سوچوں  اور اعلیٰ عزائم سے اپنی زندگی میں کوئی انقلاب نہیں لاسکتے کیونکہ خود آپ کی ذات کاایک طاقتور حصہ یعنی لاشعور آپ پر یقین نہیں کرتا اورآپ  اپنے شعوری ارادے کے ذریعے لاشعور پر اثرانداز نہیں ہوسکتے ۔ اس سلسلے میں محض عزم و ارادہ سے کام نہیں بنتا۔دراصل آپ کے لاشعوری ذہن کایہی منفی طرزِ عمل آپ کی کامیابی کی راہ میں سب سے بڑی رکاوٹ ہے۔دیگر اسباب مثلاًتقدیر، وسائل اورلوگوں کارویہ وغیرہ ثانوی حثیت رکھتے ہیں۔

کامیابی کی تکنیک

                                                                                                                 اب سوال یہ ہے کہ ہم کس طرح اپنی لاشعوری نفسیات کو بدل سکتے ہیں اورکس طرح منفی سوچوں کی جگہ مثبت خیالات کی آبیاری کرسکتے ہیں؟ اس کیلئے ایک آزمودہ اورمؤثر طریقہ ہے جسے آٹو جینک کنڈیشننگ (Autogenic Conditioning ) کہا جاتا ہے۔اس میں اپنے لاشعوری ذہن کو مثبت ترغیبات دے کر اپنے اندر گہری تبدیلی لائی جاتی ہے۔ یہ تکنیک آپ کامسئلہ حل کرسکتی ہے۔ اس طریقے کو ایک جرمن ماہر نفسیات ڈاکٹر چوہانس نے اختیار کیا اور اب اسے پورے یورپ میں فروغ دیا جارہا ہے۔ اس طریقے پر عمل کر کےآپ ان اپنی نفسیاتی کمزوریوں  کو دور کرسکتے ہیں جو ہمیشہ آپ کو ناکامی سے دوچار کرتی ہیں۔

آٹو جینک کنڈیشننگ کی یہ تکنیک تین اجزاء پرمشتمل ہے:

1) تدریجی جسمانی ڈھیلاؤ (Progressive Relaxation)

2) مثبت ترغیبات (Positive Affirmations)

3) تخلیقی تصور سازی (Creative Visualization)

                                                                                                                                                             اس طریقہ کار کی وضاحت یہ ہے کہ انسان کے ذہن میں شعوری سطح پر ہمہ وقت مختلف اقسام کی لہریں مرتعش  ہوتی ہیں۔ا ن میں  پہلی قسم کی لہروں کو بیٹا لہریں (ß-waves) کہتے ہیں جن کی فریکوئینسی بہت زیادہ ہوتی ہے۔ یہ لہریں اس وقت پیداہوتی ہیں جب ہم پوری طرح بیدار اورروزمرہ کی سرگرمیوں میں مشغول ہوتےہیں۔ اس وقت جب آپ یہ مضمون پڑھ رہے ہیں  تو آپ کے شعور پر انہی لہروں کاغلبہ ہے۔

                                                                                                                         دوسری قسم کی لہروں کی فریکویئنسی بہت کم ہوتی ہے، انھیں ایلفا لہریں   (α-waves) کہتےہیں۔یہ اس وقت پیداہوتی ہیں جب تکان کی وجہ سے ہماری شعوری سرگرمیاں دھیمی پڑنے لگتی ہیں ۔ اس کیفیت کو ہم اس وقت محسوس  کرتے ہیں جب رات کوہم نیند کے بالکل کنارے پر ہوتے ہیں یعنی سونے سے چند سیکنڈ پہلے اور اسی طرح صبح بیدار ہونے کے چند سیکنڈ بعد تک یہ حالت رہتی ہے۔ یہ شعور کی ایسی بدلی ہوئی کیفیت  (Altered State of Consciousness)  ہوتی ہے جو اس بات کاغیرمعمولی امکان پیدا کردیتی ہے کہ ہم اپنے لاشعور تک رسائی حاصل کرسکیں اور ترغیب کے ذریعے اپنے لاشعوری رجحانات کی  نوعیت میں حسبِ منشا تبدیل کرسکیں۔ یہ چیز اس وقت ممکن نہیں ہوتی جب ہمارے ذہن پر بیٹا لہروں کاغلبہ ہوتا ہے۔آٹوجینک کنڈیشننگ کامقصد یہی ایلفا حالت  بیداری کے وقت  پیداکرنا ہے تاکہ ہماری شعوری  ترغیبات بلاروک ٹوک لاشعور میں داخل ہوسکیں۔

عملی طریقہ

آٹو جینک کنڈیشننگ کا عمل سات اقدامات پر مبنی ہوتاہے:

1) سب سے پہلے ایک پرسکون جگہ کاانتخاب کریں جہاں آپ با کل تنہا ہوں۔

2) آرام دہ بستر پر پشت کے بل لیٹ جائیں اوربتدریج اپنے سب جسمانی اعضاء کو ڈھیلا کرتےجائیں۔ چہرے سے لے کر پیروں تک آپ کے جسم  میں کہیں تناؤ نہیں ہونا چاہیئے۔ خود کو ایک بے جان لاش کی طرح  محسوس کریں۔ اس عمل میں کافی وقت صرف کریں حتٰی کہ آپ پر گہرے سکون اورہلکی سی غنودگی کی کیفیت طاری ہونے لگے۔ اس وقت آپ کے ذہن پر ایلفا لہروں کابہاؤ بڑھ جائے گا۔

3) اس کے بعد دھیمے لہجے میں آہستہ آہستہ اپنی ترغیب دہرانا شروع کریں ۔مثلاً اگر آپ سگریٹ نوشی کی عادت پر قابو پانا چاہتے ہیں تو اس طرح ترغیب دیں: ۔۔۔”میری سگریٹ نوشی کی عادت ختم ہوتی جارہی ہے۔۔۔میں رفتہ رفتہ  اس طلب پر غالب آتا جارہا ہوں۔“ ۔۔۔۔ترغیب کو مسلسل دہراتے جائیں۔ اس سلسلے میں یہ خیال رکھیں کہی ترغیب ہمیشہ مثبت اور زمانۂ حال میں ہونی چاہیئے۔

4) اس کےساتھ اپنی قوتِ تصور کو حرکت دیں اور تصور کی آنکھ سے خود کومطلوبہ حالت میں دیکھیں ۔ مثلاً اگرآپ خود کو تقریر کیلئے تیار کرنا چاہتےہیں تو اپنے دماغ کی سکرین پر خود کو بھرے مجمع کے سامنے پُراعتماد اوربے باک انداز میں تقریر کرتا دیکھیں۔اپنی مطلوبہ حالت کاپوری تفصیلات کےساتھ تصور کریں مثلاً تصوراتی عمل میں مجمع میں موجود لوگوں کے چہروں کابھی جائزہ لیں اور دیکھیں کہ آپ کی تقریر سن کر ان کے چہروں پر دادوتحسین کے جذبات نمایاں ہورہے ہیں، ساری آنکھیں خاموشی کے ساتھ آپ کی طرف متوجہ ہیں وغیرہ۔

5) اپنے تصوراتی خاکے کو پورے یقین سے قبول کریں جیسے یہ آپ کا حقیقی تجربہ ہے اورپہلے سے آپ کے کردار کاحصہ ہے۔

6) اپنے آپ کو ان خوشی اورمسرت سے بھرپور جذبات کے حوالے کردیں جو خود کو مطلوبہ حالت میں تصور کرنے سے آپ کے اندر پیداہوں گے۔ ان مثبت جذبات کواپنےسارے جسم میں نفوذ کرتا محسوس کریں۔یہ عمل آپ کی ترغیب کولاشعور کی گہرائیوں میں اتار دے گا اورآپ کی مخفی قوتیں اس تصور کردہ حالت کو حقیقت میں بدلنے کیلئے متحرک ہوجائیں گی۔

7) اس کے بعد پورے جوش کے ساتھ اپنی مٹھیاں بھینچ لیں اور پُراعتماد اور ٹھوس لہجے میں خود سے کہیں: ۔۔۔”ہاں! میں یہ سب کرسکتاہوں۔۔۔ ہاں! یہ سب ہونے والا ہے۔۔۔اب کامیابی میرا مقدر ہے ۔۔ ۔“۔۔۔۔باربار یہ الفاظ دہرائیں۔

لاشعوری پروگرامنگ

                                                                                                                               اس طرح اس تکنیک کے ترغیبی،تصوراتی اورجذباتی اجزاء مل کر آپ کےلاشعور میں آپ کی شخصیت کے بارے میں ایک نیا اعتماد پیداکریں گے کیونکہ آپ کےذہن کی گہرائیوں میں آپ کی ذات کے بارے میں جو منفی تصورات پیوست ہیں، وہ بھی انہی اجزاء سے بنے ہیں۔جب آپ کو خود پر اعتماد نہیں ہوتااور احساسِ کمتری میں مبتلا ہوتے ہیں تو یہی ہوتاہے کہ آپ باربارسوچتے ہیں کہ ’میں ایک ناکام انسان ہوں۔۔مجھ میں فلاں خامی ہے‘ (یہ  اس منفی رجحان کاترغیبی پہلو ہے) ،پھر آپ خود کو دماغ کی آنکھ سے ایسا ہی دیکھنے لگتے ہیں(یہ تصوراتی پہلو ہے)، اس کے نتیجے میں آپ کے اندر مایوسی اور پریشانی کے جذبات پیداہوتے ہیں (یہ جذباتی پہلو ہے) اور یوں  آپ کایہ منفی طرزِ عمل باربار کی تکرار سے لاشعور کے اندر گہرائیوں میں جابیٹھتاہے اور پھر آپ کاکردار اسی لاشعوری  تصویر کے مطابق ہوجاتاہے۔ لہٰذا اسی عمل کی مثبت انداز میں پیروی کرتے ہوئے آپ لاشعور کے اندر نئے رجحانات اورنئے تصورات اتار سکتے ہیں اوراپنے تمام منفی جذبات اور عادات کی اصلاح کرسکتے ہیں۔

استعمالات اورفوائد

                                                                                                                                                                                      آٹوجینک کنڈیشننگ کی یہ مشق دن میں کسی بھی وقت پندرہ سے بیس منٹ تک روزانہ کریں اوررات کوسوتے وقت بھی اس مشق کے پہلے چاراقدامات کرتے ہوئے سوجائیں۔ باقاعدگی اوردلچسپی سے اس طریقے پر عمل کرنے سے ایک ماہ کے اندر آپ اپنی ذات میں نمایاں تبدیلی محسوس کریں گے۔اس طریقےسے آپ اپنی بری عادات مثلاً سگریٹ نوشی، خودلذتی، منشیات کااستعمال،ناخن کاٹنا، ہکلاکربولناوغیرہ پر چند ہفتوں میں قابو پاسکتے ہیں اورنفسیاتی الجھنوں مثلاً خوف،ڈپریشن،شرمیلاپن، خوداعتمادی کی کمی، کمزور حافظہ،بے خوابی وغیرہ کابھی مؤثر انداز میں علاج کرسکتےہیں۔

٭٭٭٭٭٭٭٭٭٭٭٭٭٭٭٭٭٭