اپنا قد بڑھائیے

اپنا قد بڑھائیے

                                                                                                                                             چھوٹے قد کامسئلہ بہت سے افراد بالخصوص ٹین ایجرز کیلئے پریشانی اورپشیمانی کاباعث ہوتاہے۔قد کے کمپلیکس میں مبتلا نوجوان سمجھتےہیں کہ چھوٹا قد ان کی سماجی زندگی پر اثرانداز ہورہے ۔اس کی وجہ سے وہ گھر کے اندر اورباہر تضحیک کانشانہ بنتے ہیں۔ بہن بھائیوں نے ان کے برے القاب رکھے ہوتے ہیں، دوستوں کی محفل میں ان پر لطائف بنائے جاتے ہیں،  انھیں دیکھ کر مخالف جنس کے لوگ زیرِ لب مسکرانے لگتے ہیں، وہ خواہ کتنی ہی دانائی کی بات کریں،ان کاچھوٹا قد ان کی بات کو بھی چھوٹا کردیتا ہے۔ لوگ اپنی پستہ قامت کے سبب گھر سے باہر نکلنے اور سماجی میل جول سے گھبراتے ہیں۔اس پر رونا یہ ہوتاہے کہ انھیں مناسب نفسیاتی رہنمائی بھی نہیں ملتی  اورنہ کوئی ان کی دلجوئی کرنے والا ہوتا ہے۔ ایسے افراد کیلئے اچھی خبر یہ ہے کہ 20سال کی عمر تک وہ اپنے قد میں اضافے کی کوشش کرسکتے ہیں۔

قد چھوٹا رہ جانے کے اسباب

                                                                                                                                                                                                                                                                          ماہرین کے مطابق انسان کے قدوقامت کا انحصار60سے 80 فیصد موروثی  جینزپر ہوتاہے۔ ہم دوسرے کوائف کی طرح قدوقامت بھی اپنے والدین سے حاصل کرتے ہیں ۔باقی کاکام  غذا اورورزش جیسے عوامل  کرتےہیں۔  ایک سال کی عمرسے بلوغت تک انسان کاقد دوانچ سالانہ کی شرح سے بڑھتاہے  تاہم بلوغت کے آغازپر یہ شرح بڑھ کرچارانچ سالانہ ہوجاتی ہے۔ لڑکوں کے مقابلے میں لڑکیوں کاقد ٹین ایج کے شروع میں  زیادہ تیزی سے بڑھتاہے۔اٹھارہ سے بیس سال کی عمر کے بعد قد کی بڑھوتری رک جاتی ہے ۔

                                                                                                                 بعض صورتوں میں جسم میں پیدا ہونے والے نشوونما کاہارمون(Human Growth Hormone) کی پیدائش میں کمی بھی چھوٹے قد کاباعث بنتی ہے۔ایسی صورت میں خون کے ٹیسٹ کے ذریعے اس مسئلے کاسراغ لگایا جاتاہے۔اگر جسم میں اس ہارمون کی مقدار کم ہوتو معالج یہ ہارمون گولیوں کی شکل میں تجویز کرتے ہیں۔ تاہم یہ علاج کوئی اسپیشلسٹ ڈاکٹر ہی کرسکتا ہے۔

آپ کیا کرسکتے ہیں؟

1) متوازن غذا کھائیے: بلوغت کے دوران جب قد بڑھنے کاعمل تیزی سے جاری ہوتاہے تو ضروری ہے کہ آپ  کی روزمرہ خوراک میں تمام غذائی اجزاء موجود ہوں۔اس کیلئے تازہ سبزیاں اورپھل خوب کھائیے۔زرعی اجناس(گندم،چاول، مکئی وغیرہ) اور پروٹین (گوشت،دالیں) کااستعمال بھی باقاعدگی سے کریں۔دودھ اوراس سے بھی ہوئی اشیاء(دہی،پنیر،لسّی وغیرہ) بھی حالات اورموسم کے مطابق لیں۔

                                                                                                                     کھانے میں مٹھاس اورچکنائیوں کااستعمال کم رکھیں۔تمباکونوشی اورشراب بھی جسم کی نشوونما پر اثراندازہوتے ہیں، لہٰذا ان سے مکمل پرہیز کریں۔

2) پوری نیند لیجیے: نیند کے دوران جسم میں ہیومن گروتھ ہارمون(HGH ) کی پیدائش ہوتی ہے ، لہٰذا اگر آپ پوری نیند نہیں لیتے تو اس سے آپ کے قد کی بڑھوتری متاثر ہوسکتی ہے۔تیرہ سے اٹھارہ سال کی عمر کے نوجوانوں کو روزانہ آٹھ سے دس گھنٹے سونا چاہیئے۔اضافی نیند سے آپ کےجسم میں گروتھ ہارمون زیادہ پیداہوگا اور اسی تناسب سے آپ کے قد میں اضافہ ہوگا۔ گویا لمبی نیند لمبے قد کی کنجی ہے۔

3) چست رہیے : ورزش کے بے پناہ صحی فوائد ہوتے ہیں۔اس سے جسم کی ہڈیاں اورعضلات مضبوط ہوتے ہیں۔جسم میں حرارت پیداہونے سے قد بڑھانے والےگروتھ ہارمون کی مقدار میں اضافہ ہوتاہے۔اس کیلئے بطورِ خاص اٹھک بیٹھک ، پش اپس، بائیکنگ ،رسہ کودنے اور لٹکنے کی ورزشیں مفید ہوتی ہیں۔قد میں اضافے کیلئے ٹینس اوربیڈمنٹن جیسے اچھلنے کودنے والے کھیل معاون ہوتے ہیں۔

4) سیدھا چلیے: ڈھیلے انداز میں جھک کر کھڑے ہونے سے نہ صرف آپ اپنے حقیقی قد سے کم دکھائی دیتے ہیں بلکہ عادت بن جانے کی صورت میں ایسا پوسچرآپ کے قد کی افزائش میں رکاوٹ  بھی پیداکرسکتاہے۔ اس با ت پر شعوری طور توجہ دیجیے کہ آپ کیسے کھڑ ے ہوتے ہیں ، کیسے بیٹھتے ہیں اور کیسے لیٹتے  ہیں۔ریڑھ کی ہڈی اورکمر کو سیدھا رکھ کر چلنا اپنی عادت بنا لیں۔

قد بڑھانے والی دوائیں

                                                                                                                                                                                  ایسی دواؤں کے حوالے سے یہ بات اچھی طرح ذہن نشین کرلیں کہ قد بڑھانے کادعٰوی کرنے والی غیرقانونی اور اشتہاری  دوائیں صحت اورپیسے کے ضیاع کاہی باعث بنتی ہیں۔اس سلسلے میں بہتر طریقہ یہی ہے کہ کسی مستند معالج سے مشورہ کرکے ہی کوئی دوا استعمال کی جائے۔ ذیل میں ایسی کچھ دوائیں دی جارہی ہیں جو مستند دواساز کمپنیوں کی تیارکردہ ہیں اوراشتہاری دواؤں کے برعکس عام میڈیکل سٹورز سے مل جاتی ہیں:

1) تھیراگران ایم(Theragran-M) گولیاں: یہ معروف دواساز کمپنی گلیکسوسمتھ کلائن (GSK) کا تیارکردہ سپلیمنٹ ہے جوایسے وٹامنز اورمنرلز پر مشتمل ہے جو جسم میں غذائی کمی کو دورکرکے نارمل جسمانی نشوونما میں معاون ہوتےہیں۔یہ ایک گولی روزانہ لی جاتی ہے۔

2) آئیڈیل گروتھ کورس(بروکس ہومیو لیب کراچی): یہ ایک ہومیوپیتھک مرکب دوا ہےجو کورس کی صورت میں استعمال کی جاتی ہے۔یہ کورس  جسم میں گروتھ ہارمون پیدا کرنے والے غدودوں کے فعل کو درست کرکے قد بڑھانے میں مددگار ہوتاہے۔اس کے علاوہ یہ پولیو سے متاثرہ بچوں میں صحت کی بحالی  کیلئے بھی مفید ہے۔

****************************

جذبات کی تنظیم

جذبات کی تنظیم 

اقتصادیاتِ جذبات

                                                                                                                                                       علمِ عضویات کا ایک اصول ہے کہ عضو کے استعمال سے عضو قو ی ہوتاہے۔مثال کےطور پر جو لوگ داہنے ہاتھ کو زیادہ استعمال کرتے ہیں،ان کا دایاں ہاتھ بائیں ہاتھ کی نسبت زیادہ مضبوط اور توانا ہوتاہے۔جو لوگ زیادہ دماغی کام کرتے ہیں ،ان میں مسائل حل کرنے کی صلاحیت جسمانی کام کرنے والوں کی نسبت زیادہ ہوتی ہے۔پیدل چلنے والے افراد میں ٹانگوں اور پیروں کی ہڈیاں اور عضلات گاڑیوں میں سفر کرنے والے افراد کے مقابلے میں زیادہ قوی ہوتے ہیں۔یعنی جس عضو کو بھی زیادہ استعمال کیا جائے گا،وہ طاقتور اور زیادہ فعال ہوجائے گا۔

                                                                                                                                                                      تاہم عضویات کے برعکس،جذبات کا اصول یہ ہے کہ جذبوں کے استعمال سے جذبے کمزور ہوجاتے ہیں۔مثلاً کسی کہانی کو بار بار پڑھنے سے اس میں دلچسپی ختم ہوجاتی ہے۔کسی نغمے کو مسلسل سنتے رہنے سے اس کی رعنائی غائب ہو جاتی ہے۔کسی اشتعال انگیز بات پر ابتدا میں جتنا غصہ آتا ہے،وہ بعد میں اسے مزید سوچ سوچ کر نہیں آتا۔کسی ناخوشگوار واقعے پر شروع میں جیسی کوفت اور جھنجلاہٹ محسوس ہوتی ہے ،وہ کچھ دنوں بعد اس واقعے کی یاد میں مفقود ہوتی ہے۔اگر کوئی خوفزدہ کردینے والی چیز بار بار انسان کی آنکھوں کےسامنے لائی جاتی رہے،تو رفتہ رفتہ اس شے کا خوف کم ہوجاتاہے۔محبت یا نفرت کا مسلسل برتاؤ یا اظہار ان جذبات کی شدت کم کردیتاہے۔

                                                                                                                                                 جذبات کی مثال پانی کے بورکی طرح ہوتی ہے۔موٹر کے ذریعے پانی کھینچنے سے بور میں پانی کی سطح گرجاتی ہے۔کچھ وقفے کے بعد بور میں دوبارہ پانی کی سطح بلندہوجاتی ہے۔اسی طرح دلچسپی،غصہ، خوف، محبت اور نفرت جیسے جذبات بھی  مسلسل رہنے سےکمزور پڑ جاتے ہیں ۔اگر ان میں وقفہ آجائے تو یہ پھر سے بھر پور انداز میں ابھر آتےہیں۔اگر آپ کسی دلچسپ فلم کو ایک عرصے بعد دوبارہ دیکھیں تو وہی پہلے کا سا لطف آتا ہے۔محبت کے بارے میں اسی لیے کہا جاتاہے کہ جدائی محبت کی آگ کو بھڑکا دیتی ہے۔غصے اور نفرت کے جذبات بھی کچھ وقت دبے رہنے کے بعد کسی تحریک سے دوبارہ جاگ اٹھتے ہیں۔

                                                                                                                                  اس سے ظاہر ہوتاہے کہ شعوری سطح پر جذباتی توانائی محدود مقدارمیں دستیاب ہوتی ہے۔اس لیے انسان کو جذبات کے معاملے میں "بچت" اور "کھپت" کے یہ اصول اختیار کرنے چاہیئں:

1) خوشگوار اور پسندیدہ جذبات کے لیے بچت سے کام لیتے ہوئےان میں وقفہ دینا چاہیے۔اگر آپ چاہتے    ہیں کہ ایک دلچسپ ناول ہمیشہ آپ کیلئے دلچسپ ہی رہےتو اسےمہینوں یا برسوں کا وقفہ دے کر  پڑھیں۔جدائی عارضی ہو تو یہ محبت کو برقرار رکھنے میں معاون ہوتی ہے۔

2) غصہ ،خوف اور نفرت جیسے منفی اور ناخوشگوار جذبات کو ایک وقت میں زیادہ سے زیادہ استعمال کرنے کی کوشش کرنی چاہیئے۔اگر آپ کو کسی بات پر غصہ آتاہے تو اپنا ذہن اس بات سے ہٹانے کی کوشش نہ کریں بلکہ اس بات کو زیادہ سے زیادہ ذہن میں لا کر اس جذباتی توانائی ختم کردیں۔اگر کسی بات کا خوف یا اندیشہ لاحق ہے توفرار کی بجائے اس کازیادہ سے زیادہ وقت کیلئے سامنا کریں تاوقتیکہ ان جذبات کی ساری توانائی خرچ ہوجائے اور آپ پرسکون ہو جائیں۔

                                                                                                                                                                                          ہر جذبے،خواہ وہ مثبت ہویا منفی، کو اپنے اظہارکیلئے توانائی چاہیئےہوتی ہے اور یہ لامحدود نہیں ہوتی۔اس لیے مثبت جذبات کی توانائی بچاکر اور منفی جذبات کی توانائی کو خرچ کرکے آپ اپنے جذبات کا بھی اسی طرح انتظام کر سکتےہیں جس طرح ایک محدود ماہانہ آمدن کو گھریلو بجٹ کے ذریعے صرف کیاجاتاہے۔

جب جذبا ت مسئلہ بن جائیں۔۔۔

                                                                                                                                                      جذبات ہماری زندگی کا ایک اہم حصہ ہیں ، لیکن بعض اوقات یہ ہمارے لیے مسئلہ بھی بن جاتے ہیں۔ عملی زندگی میں ہر شخص ایسے مواقع سے گزرتاہے کہ جب شعوری ارادے اورفیصلے دھرے کے دھرے رہ جاتے ہیں اور ہم جذبات کی گرفت میں آجاتےہیں۔ناکامیاں، صدمے، معاشی اتارچڑھاؤ، تلخ کلامیاں ، دوستوں کاتوقعات پر پورانہ اترنا، ازدواجی الجھنیں وغیرہ جیسے عوامل ہمارے اندر منفی جذبات کا ایک سلسلہ چلادیتے ہیں جس کے آگے ہم بالکل بے بس ہوجاتے ہیں۔جذبات کے ہاتھوں بسااوقات ہماری پوری شخصیت داؤ پر لگ جاتی ہے حتی ٰ کہ محبت اورخوشی  جیسے مثبت جذبات بھی قابو سے باہر ہوکر ہمیں نقصان پہنچاتے ہیں۔

اعتدال کی حالت میں جذبات ہمیں کچھ ضرر نہیں پہنچاتے، بلکہ یہ ایک لحاظ سے مفید اور ضروری ہوتے ہیں۔ مثال کے طور پر خوف اور بے چینی کے جذبات ہمیں محتاط بناتےہیں، تشویش کے جذبات ہمیں اصلاح ِ احوال کی طرف متوجہ کرتےہیں ، دل شکستگی اور محرومی کے جذبات خود انحصاری کی خواہش پیداکرتےہیں وغیرہ۔

                                                                                                                          کیا جذبات پر قابو پایا جاسکتاہے؟ جی ہاں، کوشش اورمسلسل مشق ایسا ممکن ہے۔البتہ جذبات کو مکمل طورپر کچل دینا ممکن نہیں۔بعض اوقات ایساکرنا مضر ہوتاہے مثلاً کسی عزیز کی وفات پر غم کے جذبات کو دبادینا مستقل افسردگی کاباعث بن سکتاہے۔

                                                                                                                                   نیچے چند چٹکلے یا گُر دیے جارہے ہیں جو منفی جذباتی کیفیات میں خودکو قابو میں رکھنے میں معاون ہوتےہیں:

1) پریشان کن جذبات  کی ایک وجہ آپ کے جسم کا اضطراری ردعمل ہوتاہے۔ مثلاً پسینے کا اخراج، تیز دھڑکن، کپکپاہٹ، ہاضمے کاسست پڑجانا وغیرہ۔ ایسی تبدیلیوں پر آپ کاکچھ اختیار نہیں ہوسکتا۔ ان کی نہ تو کوئی ذمہ داری محسوس کریں  اور نہ ان کے حوالے سے نادم ہی ہوں۔یہ ایک قدرتی اور جبلی عمل ہے۔

2) اس بات کو قبول کیجیے کہ کسی پریشان کن واقعے سے نہ تو ہمارے جذبات بالکل غیر متاثر رہ سکتےہیں اورفوراًبحال ہوسکتےہیں۔جذبات کاحملہ بھی انفیکشنز کی طرح ہوتاہے جو اپنی مدت پوری کرکے ہی جاں چھوڑتے ہیں۔ ان ناخوشگوار جذبات کو یہ سوچ کر پی جائیے کہ ”ایسے تجربے کے بعد میراپریشان ہوجانا بالکل فطری ہے ۔ میری جگہ کوئی دوسرا بھی اسی طرح رنجیدہ ہوتا۔“ تاہم ایسے جذبات خود پر غالب نہ آنے دیجیے۔

3) جس رویے اور طرزِ عمل کو آپ معقول اورمفید خیال کرتےہوں، اس پر خود کو پوری قوتِ ارادی کے ساتھ قائم رکھیے خواہ آپ کے جذبات آپ کاساتھ نہ بھی دیں۔ مزاحم جذبات کے باوجود اپنے فیصلے پر ڈٹے رہنا دراصل ایک اعصابی ورزش ہے جس میں بلاشبہ آغاز میں آپ کو دشواری پیش آئے گی، لیکن مسلسل مداومت سے ایساکرنا آپ کیلئے سہل ہوتا جائے گا۔

4) جذباتی بحران کے دوران مسائل کے تدارک کیلئے ایسی تدابیر اختیا ر کیجیے جو مجرب اورآزمودہ ہوں اور جن کا آپ ماضی میں کامیاب تجربہ کرچکے ہوں۔ نئی تدبیروں اورطریقوں کوآزمانے کاخطرہ مو ل نہ لیجیے کیونکہ ہنگامی اوراضطراری حالات میں ان کی کامیابی کاامکان کم ہوگا۔

5) اضطراب اورپریشانی  کے لمحات میں بعض اوقات کچھ نہ کرنا ہی بہتر ہوتاہے۔ الٹے سیدھے قدم اٹھانا مسائل میں اضافے کا باعث بن سکتاہے۔ خود کوپرسکون اورقابو میں رکھ کر اچھے حالات کاانتظار کرنا بھی ایک تدبیر ہے۔

٭٭٭٭٭٭٭٭٭٭٭٭٭٭٭٭٭

         

         

         

                      

کیرئیر کاانتخاب اور روزگارکا حصول

کیرئیر کاانتخاب اورروزگارکاحصول

                                                                                                                      آپ کی تعلیم مکمل ہوچکی ہے یا آخری مرحلے میں ہے۔اب آپ کے ذہن میں مستقبل کے سوالات ہیں۔ ایک شاندار اور عزت ومرتبے والی نوکری آپ کا خواب ہے۔یہ حقیقت ہے کہ کامیاب زندگی کیلئے مضبوط معاشی حثیت ضروری ہے ۔ آنے والے دور میں لوگ آپ کی شخصیت کا وزن آپ کی آمدنی سے ہی کریں گے۔ایک قابل ِ رشک آمدنی  والی ملازمت معاشرے میں اعلیٰ مقام کاراستہ ہموار کرتی ہے، اس لیے اس حوالے سے آپ کے خواب بھی اہم ہیں اور آپ کی جدوجہد بھی بہت اہمیت کی حامل ہے۔شاندار کیرئیر کے حصول کیلئے آپ کو منصوبہ بندی اورمؤثر حکمتِ عملی سے کام لینا ہوگا۔اپنی دلچسپیوں اور رجحانات کو جاننا  ہوگا۔ اپنے ماحول اورزمانے کے ٹرینڈز کو سمجھنا ہوگا۔اپنے وسائل کااندازہ لگانا ہوگا۔آپ کی رہنمائی کیلئے ہم یہاں ایسے اقدامات تجویز کررہے ہیں جو آپ کیلئے کامیاب کیرئیر کاحصول آسان بنا دیں گے۔

لوگ کام کیوں کرتےہیں؟

                                                                                                                 سب سے  پہلے اپنے ذہن میں یہ بات واضح کیجیے کہ آپ نوکری کیوں کرنا چاہتے ہیںَ؟ آپ کے ذہن میں کام کا کیا مقصد ہے؟  اس حوالے سے لوگ مختلف وجوہات رکھتےہیں ، مثلاً:

1) میرے پاس کوئی دوسرا راستہ نہیں ، اس لیے مجھے یہ کام کرنا پڑاہے۔

2) مجھے کھانے پینے ، رہائش اور لباس کیلئے رقم کا انتظام کرنے کیلئے کام کرنا ہوتاہے۔

3) میں ایسی مفید اشیاء خریدنے کیلئے کام کرتاہوں جن کی مجھے ضرورت تو نہیں مگر خواہش ہے۔

4) میں اس لیے کام کرتاہوں تاکہ میری فیمیلی باعزت زندگی گزار سکے۔

5) میں اس لیے کام کرتاہوں تاکہ اپنی تخلیقی صلاحیتوں کو اجاگر کرسکوں ، اپنی صلاحیتوں کی تکمیل کرسکوں اور اپنی قابلیت پر انعام حاصل کرسکوں ۔

                                                                                                                                                  ان میں سب سے پختہ فکر نمبر پانچ ہی ہے۔ یہ معاشرے کا ایک فعال اورمفید شہری بننے کی خواہش ظاہر کرتی ہے۔ اس میں اپنی دلچسپیوں اور رجحانات کاادراک موجود ہے اور اپنے کام کے ساتھ لگن اور جستجو کا جذبہ ہے۔ سب سے سطحی  اور کم پختہ وجہ وہ ہے جو نمبر ایک میں بیان ہوئی ہے۔ اس میں زندگی کے دھارے پر فردکا کوئی کنٹرول نہیں اور نہ فرد کو اپنے کام میں کوئی خوشی اورطمانیت حاصل ہے ۔ آپ کیلئے ضروری ہے کہ اپنے ذہن میں کام کے حوالے سے ترجیحات کا تعین کریں کہ آپ کام کریں گے تو کیوں کریں گے ، کس انداز سے کریں گے اور کس حد تک کریں گے۔

اپنی دلچسپیوں کا اندازہ کیجئے

                                                                                                                                                  ذاتی دلچسپیوں سے مراد وہ اندرونی احساسات ہیں جو آپ کو کسی چیز کے بارے میں جاننے یا کسی خاص سرگرمی کے انجام دینے پر مجبور کرتے ہیں۔بعض دفعہ لوگ اس کام  میں اتنے الجھ جاتے ہیں جو انھیں مجبوراً کرنا پڑتاہے کہ وہ اس کام کو بھول جاتے ہیں جو وہ کرنا چاہتےہیں۔اگر آپ کو اپنی دلچسپیوں کا اندازہ ہوجائے تو آپ اپنے لیے دلچسپ کام کا انتخاب کرنے کی پوزیشن  میں ہونگے۔سوچئے کہ سکول اورکالج میں ایسی کونسی سرگرمی تھی جسے انجام دینا آپ کوبہت اچھا لگتاتھا اورکون سا ایسا کام تھا جسے آپ صرف ناگزیر سمجھ کر کرتےتھے؟بعض دفعہ ہمیں  ایسے کام کرنے ہوتے ہیں جو ہمیں دلچسپ تو نہیں لگتے ، لیکن ان کی تکمیل سے ہمیں وہ سرور حاصل ہوجاتاہے جو ہم چاہتے ہیں مثلاً امتحان میں کامیابی، دوسروں کی تحسین وغیرہ۔

                                                                                                             بعض اوقات یہ ضروری ہوتاہے کہ ہم اپنی فوری خواہشات کو التواء میں رکھ کر ایسے کام کریں جن سے ہم لطف اندوز نہیں ہوسکتے، مگر ان کے ذریعے ہم اپنا مقصد پاسکتے ہیں۔بعض لوگ کسی خاص کام میں اتنی دلچسپی پیداکرلیتےہیں کہ اسے کیے بغیر انھیں چین نہیں آتا۔ کیا آپ کےساتھ کبھی ایسا ہواکہ آپ نے ایک کتاب کامطالعہ شروع کیا ہویا کوئی ٹی وی پروگرام دیکھنا شروع کیا ہو یا کسی مسئلے پر بحث کرنا شروع کی ہو اورپھر آپ کو وقت کا کوئی احساس ہی نہ رہا ہو؟ سوچیے کہ کونسی ایسی سرگرمی ہے جس کے دوران آپ کے گھنٹے منٹوں میں گزرجاتےہیں؟ آپ کو کیسے کاموں میں دلچسپی ہے : مکینیکل چیزوں میں ؟ معلوماتی باتوں میں ؟ رنگوںیاتصاویرسے ؟لوگوں سے ملنے جلنے میں ؟ دلچسپی کے بنیادی میدان یہی تین ہیں:

1) چیزوں سے دلچسپی : اگر آپ کی دلچسپی یہ ہے کہ تو آپ ہر اس شعبے میں جاسکتے ہیں جہاں مشینوں اورآلات کو استعمال کیا جاتاہو، ان کے نقشے بنائے جاتےہوں یا ان کی مرمت کی جاتی ہو۔

2) لوگوں سے دلچسپی: یہ دلچسپی انسانی تعلقات کےان سب پہلوؤں پر محیط ہےجن میں دوسرے لوگوں سے واسطہ ہوتاہے ۔اس میں لیڈرشپ، سیلزمین شپ،خدمتِ خلق،ٹیچنگ، مشاورت ،رہنمائی (کونسلنگ )، بچوں کی دیکھ بھال (چائلڈ کیئر)وغیرہ جیسے کام آجاتے ہیں۔

3) معلومات (انفارمیشن یا ڈیٹا) یارنگوں سے دلچسپی:اس سے مراد اعداد ،الفاظ اورتصاویر سے دلچسپی ہے۔اس دلچسپی کے حامل افراد ان تمام شعبوں میں جاسکتے ہیں جہاں معلومات کو اکٹھا کیاجاتا ہو، ان کا تجزیہ کیا جاتاہو اورانھیں خاص انداز میں ترتیب دے کر پیش کیا جاتاہو۔مثلاً انفارمیشن ٹیکنالوجی کاشعبہ ، گرافک ڈیزائننگ ،پینٹنگ ،شماریات کے محکمے، اکاؤنٹس کے کام، کلیریکل جاب وغیرہ۔  

                                                                                                          اکثر پیشے ایسے ہیں جن میں بیک وقت اشیاء، لوگوں اورمعلومات تینوں ہی سے معاملہ کیا جاتاہے۔ مثلاًایک ڈاکٹر کو چیزوں(آلات) سے بھی واسطہ ہوتاہے ،مریض اورمرض کے بارے میں معلومات بھی جمع کرنی ہوتی ہیں اورمریضوں کیلئے ایک ہمدرد اورشفیق مشیر بھی بننا ہوتاہے۔ اس لیے پہلے توآپ اپنی دلچسپی کاکھوج لگائیں، پھر جس پیشے کاآپ نے انتخاب کیا ہو، اس میں دیکھیں کہ آپ کی دلچسپی کاکام کس حد تک ہے۔

اپنی صلاحیتوں کو جانیے

                                                                                                      صلاحیت یا استعداد سے مراد آپ کے اندر پوشیدہ وہ فطری صلاحیت ہے جو آپ کو کسی خاص شعبے میں زیادہ کامیابی دے سکتی ہے۔یہ صلاحیت ذہنی بھی ہوسکتی ہے اور عملی بھی ۔کیا آپ تیز دوڑ سکتے ہیں؟ کیا آپ کو الفاظ  سمجھنے  اورادا کرنے میں زیادہ مہارت ہے؟ کیا آپ حساب کتاب دوسروں کے مقابلے میں جلدی کرلیتے ہیں؟ کیا آپ کی قوتِ متخیلہ(Imagination) زیادہ تیز ہے اور آپ چیزوں کا تصور بہتر طورپر کرلیتےہیں؟کیا آپ اشیاء کی صورت اورجسامت میں اچھی طرح فرق کرسکتے ہیں؟کیا آپ اپنے ہاتھوں اور انگلیوں کو تیز رفتاری سے حرکت دینے پر قادر ہیں؟ کیا آپ مختلف رنگوں میں امتیاز کرسکتے ہیں؟ وغیرہ۔

                                                                                                         ان میں سے ہر استعداد آپ کو کئی شعبوں میں کامیابی دلاسکتی ہے۔ مثلاً جولوگ رنگوں کے درمیان فرق اورمماثلتوں کو اچھی طرح پہچاننے کی ستعداد رکھتے ہیں  ، وہ ٹیکسٹائل ڈیزائننگ کے شعبے میں بھی جاسکتے ہیں اور پینٹنگ کےآرٹ  کو بھی اختیا ر کرسکتے ہیں۔تاہم استعداد کے ساتھ ساتھ آپ کو اس شعبے کی خصو صی تعلیم بھی حاصل کرنا ہوگی۔ اس طرح آپ اپنی استعدادکو کیرئیر میں  تبدیل کرسکیں گے۔ کسی خاص کام کی استعداد رکھنے کے باوجود ہوسکتاہے کہ وہ کام آپ کیلئے دلچسپ نہ ہو مثلاً رنگوں میں امتیاز کی صلاحیت ہونے کے باوجود آپ کو ٹیکسٹائل ڈیزائننگ کاکام اچھا نہ لگتاہو۔ اس لیے اس بات کو سمجھیے کہ استعداد آپ کے کیرئیر کے انتخاب کامحض ایک حصہ ہے۔چنانچہ آپ کو ایسے کیرئیر کاانتخاب کرنا ہے جس کی آپ کے اندر استعداد بھی ہو اور دلچسپی بھی۔

اپنی اقدارمتعین کیجیے

                                                                                                                                                         اقدار(Values) سے مراد آپ کے نظریات اورمن پسند طرز عمل ہے ۔آپ کے نظریات لازمی طورپر صحیح یا غلط نہیں ہوسکتے  لیکن اگر آپ خلوصِ دل سے ان کی پیروی کریں گے تو ان سے آپ کو اپنی زندگی کا رح طے کرنے میں مدد ملے گی۔خاص طور پر کام کے متعلق اقدار کا تعین بہت ضروری ہے۔ کیا آپ  اپنے معاشرے کی اصلاح میں دلچسپی رکھتے ہیں؟ماحول  کوسب کیلئے محفوظ بنانے کے خواہشمند ہیں؟فکروعمل کے نئے زاویے دریافت کرنے کا رجحان رکھتے ہیں؟آپ نے اپنے لیے جس پیشے کاانتخاب کیا ہے، وہ کن اقدار کا تقاضا کرتاہے؟ یہاں آپ کی توجہ کیلئے اقدار کی ایک فہرست دی جارہی ہے:

٭تحفظ: کیا یہ آپ کیلئے اہم ہے کہ آپ کے روزگار  میں کوئی اتارچڑھاؤ نہ ہواور آپ کی ملازمت مستقل بنیادوں پر ہو؟کیا آپ  لازمی طورپر پینشن والی نوکری چاہیں گے؟

٭علم: کیا یہ آپ کیلئے اہم ہے کہ آپ  کی معلومات ِ عامہ میں مسلسل اضافہ ہو؟ آپ کی نوکری ایسی ہو جس میں آپ کو مسلسل کچھ نیا سیکھنے کو ملتارہے اور آپ مختلف اشیاء اورجگہوں کے بارے میں جانتے رہیں؟

٭ خانگی رشتے: کیا آپ ایک  ایسی نوکری قبول کرلیں گے جو آپ کوگھر اوراہلِ خانہ  سے دور کردے؟ کیا گھروالوں کے ساتھ رہنا آپ کیلئے اہم ہے؟

٭آزادی: کیا آپ اپنا کام اپنی مرضی کے طریقوں سے کرنا چاہتےہیں؟ کیا آپ کو دوسروں سے ہدایات لینا پسند ہے؟ کیا آپ ایساکام پسند کریں گے جس میں دوسروں  کی مرضی پر چلنا ہو؟

٭دولت: کیا آپ زندگی میں بہت دولت کمانا چاہتے ہیں؟ کیا آپ خود کو ایک اوسط درجے کی آمدنی  پر مطمئن کرپائیں گے؟آپ دولت برائے دولت کے قائل ہیں یا دولت برائے ضرورت کے ؟

٭ مذہب: کیا آپ ایسا کام قبول کرلیں گے جو کسی نہ کسی انداز میں آپ کے مذہبی عقائد سے ٹکراتاہو؟ کیا آپ ایسے لوگوں کے ساتھ کام کرسکیں گے جن کا مذہب آپ کے مذہب  سے مختلف ہو؟

٭تخلیق: کیا آپ کیلئے نئی اشیاء اورنئے خیا لات کی تخلیق اہم ہے؟ کیا آپ ایسے کام سے خود کو مطمئن کرپائیں گے جس میں سب کچھ لگے بندھے طریقوں سے ہوتاہو اور کچھ نیا کرنے کی گنجائش نہ ہو؟

٭قیادت: کیا آپ دوسروں کو ہدایات دینا پسند کرتےہیں؟ کیا آپ بڑےفیصلے لینا، صورت حال کو کنٹرول کرنا اور دوسروں کی رہنمائی کرنا پسند کرتےہیں؟

٭کام کاماحول: کیا آپ دفتر یا فیکٹری کے اندر کام کرنا پسند کرتےہیں یا باہر کھلی جگہ  میں ؟ کیا آپ کام کی جگہ پر جدیدسہولیات(ایئرکنڈیشنر،ٹی وی وغیرہ) چاہتے ہیں؟ کیا آپ کام کے دوران خاموشی اور سکون پسند کرتے ہیں؟

٭صحبت:  کیا آپ کو اپنے ہم مزاج لوگوں کے ساتھ کام کرنا پسند ہے؟ کیا آپ اپنے رفقائے کار کے ساتھ کام کالطف اٹھائیں گے یا اکیلے کام کرنے کو ترجیح دیں گے؟

                                                                                                                                      مندرجہ بالا نکات کی روشنی میں آپ اپنی ذاتی اقدارکا تعین کرسکتے ہیں۔ کیرئیر کے انتخاب میں آپ نے اپنی ان ذاتی اقدارکو بھی پیشِ نظر رکھنا ہے ۔

پیشہ ورانہ قابلیت حاصل کیجیے

                                                                                                                   جب آپ اپنی دلچسپیوں، استعدادوں اور اقدار کاادراک کرچکیں تو آپ کیلئے کیرئیر کے انتخاب کامرحلہ آسان ہوجائے گا۔کیرئیر کانتخاب کرلینے کے بعد آپ کیلئے ضروری ہے کہ آپ منتخب کردہ پیشے کی مخصوص پیشہ ورانہ مہارت حاصل کریں۔ اس میں آپ کو چند ماہ سے دوتین سال لگ سکتے ہیں۔ بعض طالب علم دورانِ تعلیم ہی پیشہ ورانہ قابلیت حاصل کرنا شروع کردیتےہیں۔پیشہ ورانہ قابلیت کے بغیر آپ  کم آمدنی والی نوکری ہی حاصل کرپائیں گے  اور بعض اوقات ایسی نوکری کاحصول بھی مشکل ہوجاتاہے۔ کسی پیشہ ورانہ  کورس میں داخلہ لینے سے پہلے درکار مدت اور اخراجات کیلئے منصوبہ بندی کرلیجیے۔ ایسے کورسز بعض سرکاری شعبے  محکمانہ طور پر کراتے ہیں جن کی فیس کافی کم ہوتی ہے۔ اس حوالے سے پہلے اچھی طرح معلومات حاصل کرلیں اورنجی اداروں میں داخلہ لینے سے پہلے ان کے بارے میں خوب چھان بین کرلیجیے۔

نوکری کی تلاش

                                                                                                   نوکری کی محض خواہش رکھنا کافی نہیں، آپ کو اپنی ضرورت اور دستیابی سے روزگار دہندہ افراد اوراداروں کو مطلع کرنا ہے۔ اس کیلئے آپ یہ طریقے اختیار کرسکتےہیں:

1) اخبارات میں اشتہارات دیکھیے:- یہ نوکری ڈھونڈنے کاسب سے عام طریقہ ہے۔ عام طورسے اخبارات کے اتوار کے ایڈیشن خالی آسامیوں کے اشتہارات سے بھرے ہوتے ہیں۔ ان میں سرکاری اورنجی شعبے میں نوکریوں کیلئے درخواستیں طلب کی جاتی ہیں۔خالی آسامی کا اشتہار عام طورپر ان اجزاء پر مشتمل ہوتاہے: ٭نوکری کا عنوان ٭نوکری کامختصر تعارف٭مطلوبہ قابلیت٭نوکری دینے والے ادارے کانام اورپتا٭ کب اورکس سے رابطہ کرنا ہے٭کون سی تعلیمی اورپیشہ ورانہ دستاویزات ساتھ لانی ہیں۔

                                                                                                                                     بے روزگاری کی بڑھتی ہوئی شرح کے باعث ان شتہارات کے جواب میں  کثرت سے لوگ  درخواستیں دیتے ہیں اورامیدواروں کے درمیان نوکریوں کیلئے سخت  مقابلہ ہوتاہے۔رشوت اورسفارش جیسی سماجی قباحتیں اگرچہ مستحق افراد کے ساتھ نا انصافی کاسبب بنتی ہیں، لیکن آپ کو مایوس اوربددل ہوئے بغیر مختلف آسامیوں کیلئے قسمت آزمائی کرتے  رہنا چاہیئےا ور اپنی حد تک ٹیسٹ اور انٹر ویوز کیلئے بھرپور تیاری کرنی چاہیئے۔

2) آپ خود رابطہ کیجیے:-یعنی آپ خود روزگار دینے والے افراد یا اداروں سے رابطہ کریں۔آپ ٹیلی فون ڈائریکٹری اور انٹر نیٹ سے ایسے اداروں،فیکٹریوں،کارخانوں،پرائیویٹ فرموں،اسکولوں اورکالجوں کے نام اورپتے نوٹ کرسکتےہیں۔فون کی صورت میں آپ کاپہلارابطہ استقبالیے سے ہوگا۔آپ اپنا تعارف بتادیں اورنئے افراد کی بھرتی کرنے والے شعبے کے سربراہ کانام پوچھیں اوراس سے بات کرانے کی درخواست کریں۔ اگر متعلقہ فرد فی الحال دستیاب نہیں تو دوبارہ رابطے کیلئےموزوں وقت دریافت کرلیں۔جب متعلقہ فرد سے رابطہ ہوجائے تو اپناتعارف کرانے کے بعد ادارے میں خالی آسامیوں یا درکار سروسز کے بارے میں پوچھیں اور نوکری حاصل کرنے کاطریقہ پوچھیں۔ہوسکتاہے کہ اس رابطے کے نتیجے میں آپ کو انٹرویو کیلئے وقت دے دیا جائے یا آپ کے کوائف تحریری طورپر مانگ لیے جائیں۔

3) اپنی واقفیت استعمال کیجئے:- نوکری کی تلاش کا ایک مؤثر طریقہ یہ بھی ہے کہ آپ اپنے حلقۂ احباب اورجان پہچان والے افراد کی مدد لیں۔آپ کے اساتذہ،ہم جماعت،دوست،پڑوسی ،مقامی تاجر اورآپ کے خاندان کے افراد اس سلسلے میں آپ کے معاون ہوسکتے ہیں۔ایسے ذاتی تعلقات آپ کو نہ صرف کہیں نوکری کی دستیابی کے متعلق معلومات دے سکتے ہیں بلکہ آپ کو کئی جگہوں پر متعارف بھی کراسکتے ہیں۔یہ حقیقت ہے کہ بہت سے لوگ ایسے تعلقات ہی کے ذریعے نوکری حاصل کرتے ہیں۔

4) پیشہ ورانہ اورتجارتی تنظیموں سے رابطہ کیجیے:- لیبر یونینز، تاجروں کی انجمنیں،ڈاکٹروں کی تنظیمیں اوربعض فلاحی ادارے نوکری کی تلاش  میں آپ کی مدد کرسکتے ہیں۔اس سلسلے میں آپ ان کے دفاتر سے رابطہ کرسکتے ہیں۔ایسی تنظیموں کے میگزین اوررسائل میں بھی خالی آسامیوں کے اشتہارات ہوتے ہیں۔

 5) روزگار کے دفاتر سے رابطہ کیجیے:-حکومت کی طرف سے تقریباً تمام بڑے شہروں  میں روزگار کے دفاتر کھولے جاتے ہیں۔ایسے دفاتر بے روزگار افراد کو مفت رکنیت دے کر انھیں مختلف سرکاری شعبوں میں خالی آسامیوں کے بارے میں معلومات فراہم کرتے ہیں۔اس کے علاوہ یہ مختلف پیشہ ورانہ کورسز میں داخلوں اوربیرونِ ملک روزگار کے مواقع کے متعلق بھی آگاہی دیتے ہیں۔بعض نجی ادارے بھی  روزگار کے دفاتر کھول کر لوگوں کی رہنمائی کرتےہیں، لیکن اس حوالے سے آپ کو محتاط رہنا چاہیئے کیونکہ بعض ایسے ادارے دھوکادہی اور غیر قانونی دھندوں میں بھی ملوث ہوسکتے ہیں۔

کامیاب انٹرویو کے گُر

                                                                                                                                                          انٹرویو اپنی شخصیت کو دوسروں کی نظر سے دیکھنے کاایک موقع ہے۔ آپ خود کو جتنے مؤثر انداز میں دوسروں کے سامنے پیش کریں گے، اتنے ہی ملازمت ملنے کے امکانات زیادہ ہوں گے۔انٹرویو لینے والے آپ کی یہ باتیں دیکھنا چاہیں گے:

٭ کام کیلئے آپ کی پیشہ ورانہ مہارت اور آپ کا  اپنے شعبے میں واقعی علم۔

٭ متعلقہ ادارے یا محکمے اصول وضوابط کی پیروی کیلئے آپ کی آمادگی۔

٭ دوسروں کے ساتھ کام کرنے کی صلاحیت ۔

٭ آپ کااخلاص ،دیانت داری اور حسنِ عمل۔

                                                                                                                           انٹرویو کے دوران آپ کے ذاتی پس منظر اورآپ کی متعلقہ شعبے سے دلچسپی کے حوالے سے کئی سوالات پوچھے جائیں گے۔ آپ سے ماہانہ تنخواہ کے تعین پر بات ہوسکتی ہے۔انٹر ویو کے دوران آپ کے  لب  ولہجہ، جسمانی حرکات، چہرے کے تاثرات اورآپ کے اندازِ نشت سے آپ کی خوداعتمادی اورطرزِ عمل کا اندازہ لگانے کی کوشش کی جائے گی۔

                                                                                                                    انٹرویومیں کامیابی  کیلئے اوراچھا تاثر دینے کیلئے ان باتوں پر عمل کیجیے:

1) ہمیشہ وقت پرپہنچئے۔ تاخیر آپ کے خلاف جائے گی۔اگر انٹرویو کی جگہ معلوم نہ ہو تو انٹرویو سے ایک دودن پہلے جاکر اس جگہ کو دیکھ لیں تاکہ عین اس دن مقام ڈھونڈنے میں وقت ضائع نہ ہو۔

2) انٹرویو کیلئے اکیلے جائیے۔ آپ کے ساتھ سرپرست یا دوست احباب نہ ہوں۔ یہ آپ کی پختگی اورخودانحصاری کو ظاہر کرے گا۔

3)  ہر سوال توجہ سے سنیے۔ اگر کوئی سوال صحیح طرح سمجھ میں نہ آئے تو دوبارہ پوچھنے کی درخواست کریں۔

4)  جواب دینے سے  پہلے سوچنے کیلئے تھوڑاساوقفہ کیجیے۔

5) آپ کے جوابات مثبت، مختصر لیکن جامع ہونے چاہیئں۔ البتہ اگر کہا جائے تو اپنے جوابات کو تفصیل واضح کرنے کیلئے تیا ررہیئے۔

6) مطلوبہ نوکری کیلئے اپنا پرجوش اشتیاق ظاہر کیجیے۔یوں ظاہر نہ کریں جیسے آپ محض تجربے کیلئے انٹرویو دے رہے ہیں۔

7) انٹرویو کے دوران پرسکون رہنے کی کوشش کریں۔ تھوڑی بہت گھبراہٹ فطری بات ہے ۔

8) انٹرویوکے دوران اپنے ذاتی یا گھریلو مسائل کا تذکرہ مت کریں۔ اس طرح ہمدردیا ں حاصل کرنا اچھا تاثر پیدانہیں کرتا۔

9) کسی بات کو لے کر انٹرویو لینے والے کے ساتھ بحث نہ کریں۔بس اپنی بات کہہ کر خاموش ہوجائیں۔

10) سیدھی سادی اورصاف زبان استعمال کیجیے۔تصنع اورتکلف اختیار نہ کیجیے۔

11) انٹرویو لینے والےکی بات کاٹ کر کچھ نہ کہیں۔ اپنی بات کہنے کیلئے مناسب لمحے کاانتظار کیجیے۔

12) انٹرویو لینے والے کی آنکھوں میں آنکھیں ڈال کر بات اعتماد سے بات کیجیے ۔اگر کسی سوال کاجواب معلوم نہ ہو تو خود سے کوئی جواب گھڑنے کی بجائے معذرت کرکے اگلا سوال پوچھنے کا کہیے۔

13) انٹرویو ختم ہونے پر مناسب الفاظ میں سب کاشکریہ اداکیجیے کہ آپ کو وقت دے کر انٹرویو لیا گیا۔

14) اگر آپ کی درخواست پر انفرادی طور پر انٹرویو کیلئے بلایا گیا تھا تو انٹرویو کے بعد گھر جاکر ایک دودن بعد انٹرویو لینے والوں کو ایک شکریے کاخط لکھیں کہ آپ اس طرح وقت دیے جانے پر ممنون ہیں اور اپنے حق میں مثبت جواب کے منتظر ہیں۔۔

انٹرویو کے بعد

                                                                                                                               امکان یہ ہے کہ نوکری کے حصول کیلئے آپ کو متعددانٹرویو دینے پڑیں گے۔ہر انٹرویو کے بعد اس کی تحریری روداد اپنے پاس لکھ لیجیے اور سیکھنے کیلئے یہ باتیں سوچیے:

٭آپ کی باتوں پر انٹرویو لینے والوں کاردِعمل کیساتھا؟

٭ کون سی بات کہنے سے رہ گئی یا اپنے بارے میں کونسی معلومات مزید دینی چاہیئے تھی؟

٭ کون سے جوابات ایسے تھے جو آپ کے خیا ل میں نہیں دیے جانے چاہیے تھے؟

٭ آپ کی کس بات میں انٹرویو لینے والوں نے دلچسپی ظاہر کی؟

٭ آپ انٹرویو کے دوران زیادہ بولے یا کم؟

٭ کیا آپ انداز اور ظاہری شخصیت متاثرکن تھی؟

٭ اگلے انٹرویو کیلئے آپ کو اپنے اندر کس قسم کی تبدیلی اوربہتری کی ضرورت ہے؟

٭٭٭٭٭٭٭٭٭٭٭٭٭٭٭٭