نفسیاتی چٹکلے

نفسیاتی چٹکلے

                                                                                                                                                                                                                                         آج کے دور میں ذہنی اور نفسیاتی امراض میں جس قدر ہوشربا اضافہ ہورہاہے ، اس سے ہر فرد آگاہ ہے۔مغرب میں بھی جہاں نفسیاتی تحقیق اورعلاج کاکام بڑے پیمانے پرہورہا ہے  ،نفسیاتی پیچیدگیاں قابو سے باہر ہورہی ہیں۔ہمارے ہاں تو صورتِ حال اوربھی زیادہ تشویش ناک ہے۔پاکستان میں مستند ماہرین نفسیات کی تعداد انگلیوں پرگنی جاسکتی ہے اورنفسیاتی کلینک بھی صرف چند ایک بڑے شہروں میں قائم ہیں ۔باقی آبادی میں نہ تو نفسیاتی علاج کی سہولت دستیاب ہے اورنہ یہ خود لوگوں میں نفسیاتی علاج کاشعور موجود ہے۔

اس صورت حال کاکسی قدر ازالہ یوں ہوسکتاہےکہ ہر فرد نفسیاتی مسائل اوران کے حل کے بارے میں کچھ نہ کچھ معلومات حاصل کرے اور بوقتِ ضرورت نہ صرف خود ان سے فائدہ اٹھا سکے بلکہ دوسروں کی بھی رہنمائی کرسکے ۔ذیل میں چند عام نفسیاتی امراض اورمسائل کے آسان اور آزمودہ علاج بتائے جارہے ہیں۔مگر یہ بات واضح رہنی چاہیئے کہ شدید اورپیچیدہ صورتوں میں مستند نفسیاتی علاج کے بغیر چارہ نہیں  اوراس میں تاخیر نہیں کرنی چاہیئے۔

خوف(فوبیا)

                                                                                            کسی بھی قسم کے خوف کاآخری علاج اس کا سامنا کرنا ہے ۔ اس کا ایک آسان طریقہ یہ ہے کہ کاغذ قلم لے کر بیٹھ جائیں اور جس چیز سے بھی آپ خوفزدہ ہیں، اس کی تصویر بناناشروع کردیں خواہ کیسی بھی بنے اور مسلسل بناتے جائیں۔روزانہ پندرہ بیس منٹ یہ مشق کریں۔ چند ہی دنوں میں آپ کاخوف تحلیل ہوجائے گا۔

وہم اوروسوسے

                                                                                                                         وہم اوروسوسوں کی بیماری بہت اذیت ناک ہواکرتی ہے۔مثلاً انسان کے ذہن میں یہ بات چپک جاتی ہے کہ اس کے  ہاتھ پاک صاف نہیں ہیں لہٰذا وہ مسلسل اپنے ہاتھوں کوپانی سے دھوتارہتاہےمگر ناپاکی کااحساس ختم نہیں ہوتا۔اس کاعلاج عملی نوعیت کاہے ۔وہ یہ کہ اپنے خیالات سے جنگ نہ کریں بلکہ کسی ایسے معقول اورباوقار انسان کی صحبت میں بیٹھنا شروع کردیں جس سے آپ بہت متاثر ہوں اوراس کے ان معمولات کا بغور مشاہدہ کریں کہ وہ کس طرح اپنے ہاتھ  منہ دھوتاہے اورکتنی بار دھوتاہے۔کن چیزوں کو چھونے کے بعد وہ ہاتھ دھوتاہے  اورکن چیزوں کو وہ پاک خیال کرتاہے۔اس مشاہدے سے آپ اپنے وہم سے نجات حاصل کرلیں گے۔آزمائش شرط ہے۔یہی علاج دوسری قسم کے وہموں اوروسوسوں کیلئے بھی اختیار کیا جاسکتاہے۔

ذہنی انتشار

                                                                                                                 اگر آپ ذہنی اورفکری انتشارمیں مبتلا ہیں اورآپ کاذہن مختلف اورمتضاد خیالات کی آماجگاہ بنا رہتاہے تو اس کانہایت آسان حل یہ ہے کہ آپ روزنامچہ یعنی ڈائری لکھناشروع کردیں۔اس میں نہ صرف اپنے دن بھر کے معمولات تحریر کریں بلکہ ذہن میں آنے والے خیالات کو بھی ترتیب سے لکھتے رہیں خواہ یہ  خیالات کتنے ہی بے معنی اورشرمناک کیوں نہ ہوں۔کچھ عرصے کے بعد آپ نوٹ کریں گے کہ آپ کے خیالات میں سلجھاؤ آرہا ہے اور ذہنی انتشار دور ہو رہا ہے۔روزنامچہ لکھنے کے دیگر فوائد اس کے علاوہ ہیں۔

جذباتی صدمہ

                                                                                                      جی بھر کر آنسو بہالینا کسی بھی جذباتی صدمے  اوردباؤ کا فرسٹ ایڈ علاج ہے۔آنسوؤں کو روکنا نہیں چاہیئے، یہ قدرت کاایک تحفہ ہیں۔بعض لوگ رونے دھونے کو "مردانگی " کےخلاف سمجھتے ہیں۔مگر یہ "مردانگی " دل کے امراض،بلڈ پریشر اورڈپریشن کی قیمت پر حاصل ہوا کرتی ہے!

اعصابی تناؤ

                                                                                                     عام ذہنی تناؤ اوربوریت کاعلاج ہلکے سروں پر مبنی دھیمی موسیقی کاسننا ہے ۔موسیقی سے دل  بہلانا نہ صرف اعصاب کو پر سکون بناتاہے بلکہ اس سے نفسیاتی وجوہ سے ہونے والے سردرد اور بے خوابی جیسے مسائل بھی دور ہوجاتے ہیں۔

پریشانی کاعلاج

                                                                                                                خود کوکام میں مصروف کرلینا، کسی بھی قسم کی پریشانی اوراضطراب کامؤثر  ترین توڑ ہے۔

بے خوابی

                                                                                                                                                                                                                 بے خوابی کا ایک تیربہدف علاج یہ ہے  کہ رات کو کسی مشکل اور غیردلچسپ کتاب کامطالعہ شروع کردیں۔کچھ دیر بعد ہی آپ کو نیند کے جھونکے محسوس ہونے لگیں گے مگر کتاب کامطالعہ جاری رکھیں، یہاں تک کہ وہ خود آپ کے ہاتھوں سے چھوٹ کر گرپڑے۔

الجھن یامسئلہ

                                                                                                                                                                اگر آپ کسی الجھن سے دوچار ہیں اوراسے سلجھانامقصود ہے تو اس کابہترین طریقہ یہ ہے کہ صبح یاشام کےوقت کسی باغ یا سبزہ زار میں چہل قدمی کریں اوراس دوران اپنے ذہن کو مسئلے کے حل کی طرف لگائیں۔ طبی تحقیقات کے مطابق چہل قدمی کے دوران انسانی ذہن کی تخلیقی صلاحیت میں کئی گنا اضافہ ہوجاتاہے اورمسئلے کاحل مل جانےکے امکانات بہت روشن ہوجاتےہیں۔

ارادے کی کمزوری

                                                                                                                                                    آپ جانتے ہیں کہ مضبوط قوتِ ارادی کے بغیر کسی کام میں کامیابی ممکن نہیں۔مگر اپنی قوتِ ارادی میں کس طرح اضافہ کیا جائے؟ اس کاطریقہ ایک ماہر نفسیات نے یہ تجویز کیا ہے کہ ماچس کی ڈبیا سے ساری تیلیاں نکال کرفرش پربکھیر دیں اوراس کے بعد یہ تیلیاں دوبارہ ایک ایک چن کر ڈبیا میں ڈالنی شروع کردیں اوراس کے بعد دوبارہ تیلیاں نکال کر پھر ڈبیا میں جمع کریں ۔اس طرح باربار کی مشق سے آپ کی قوتِ ارادی میں حیرت انگیز اضافہ ہوجائے گا اورآپ کی مشکل اورصبر آزما کاموں کو کرنے کی صلاحیت بڑھ جائے گی۔ایک متبادل مشق یہ بھی ہےکہ دھاگے کے کسی گچھے کوپہلے آپس میں بری طرح الجھادیں اوراس کے بعد اسے پورے صبروتحمل سے سلجھانے کی کوشش کریں۔

غصہ اورہیجان

                                                                                            غصے اورشدید ہیجان کوفرو کرنے کاطریقہ یہ ہے کہ ایک گلاس تازہ اورٹھنڈا پانی پیئں اوراس کےساتھ اپنی جسمانی پوزیشن اورجگہ بدل دیں یعنی بیٹھے ہوں تو اٹھ کر ٹہلنے  لگ جائیں، ایک کمرے سے دوسرے کمرے میں چلے جائیں، گھر سے کچھ دیر کیلئے باہر نکل جائیں۔

علاجِ غم

                                                                                                ہنسی زمانہ قدیم سے علاجِ غم مانی جاتی ہے۔لطائف کی ایک کتاب یامزاحیہ وڈیو، سکون بخش دواؤں سے زیادہ فائدہ دیتی ہے۔

ہرنفسیاتی مسئلےکاحل

                                                                                                           اورآخر میں ہم اس حقیقت کی طرف توجہ دلائیں گے کہ "دعا" ہر قسم کے نفسیاتی  مسئلے کاشافی علاج ہے ۔ اسے کسی حال میں بھی فراموش نہیں کرنا چاہیئے۔

٭٭٭٭٭٭٭٭٭٭٭٭٭

         

         

                      

خودتقویتی

خودتقویتی

اپنے جذبات اورخواہشات سے براہ راست الجھے بغیر 

  اپنی بری عادات سے نجات پانے کا ایک منفرد اورتیر بہدف طریقہ

 

                                                                                                                                                                                                خود تقویتی(Self-Reinforcement) اپنی بری عادات کوترک کرنے اورمثبت کردار کو اپنانے کاایک بہت ہی مؤثر،سہل اورسریع الاثر طریقہ ہے جس کی مدد سے آپ اپنے منفی جذبات اوررجحانات سے براہ راست کشمکش کیے بغیر اپنی شخصیت کی اصلاح کرسکتے ہیں۔تاہم اس تکنیک کے عملی طریقے بتانےسے پہلے ہم اس کے علمی پس منظر  کو مختصراً بیان کریں گے۔

کرداریت

                                                                                                                                                            کرداریت(Behaviorism) جدید نفسیات کی ایک شاخ ہے  جس کی بنیادی ماہر نفسیات واٹسن نے 1912ء میں رکھیں۔اس کے بعد بی –ایف سکنرنے اسے  بام عروج پر پہنچایا۔کرداریت میں انسانی ذہن کے صرف کرداری پہلو سے بحث کی جاتی ہے جبکہ ذہنی عمل سے اعتنا نہیں کیا جاتا۔اپنی تعریف کی رو سے کردار(Behavior) ان جوابی افعال پرمشتمل ہوتاہے جن کامظاہرہ زندگی اور ذہن رکھنےوالی اشیاء خارجی محرکات کے زیراثر کرتی ہیں۔کرداری نفسیات انسانی افعال کاسبب انسان کے ذہن اورخیالات میں نہیں  بلکہ انسان کے خارجی ماحول میں تلاش کرتی ہے ۔ یعنی اس کے مطابق انسانی شخصیت خارجی محرکات اوران  کے زیراثر اختیار کیے گئے ردعمل سے عبارت ہوتی ہے۔

انسانی کردار کی دواقسام 

                                                                                                                                                                                                     سکنر نے انسانی کردار کودواقسام  متعین کی ہیں: 1) مفعولانہ کردار(Respondent Behavior) 2) اور فاعلانہ کردار(Operant Behavior)۔مفعولانہ کردار کسی خاص محرک کے تحت اضطراری ردعمل پر مبنی ہوتاہے ۔مثال کے طورپر تیز روشنی پڑنے پر آنکھ کے پپوٹے کاجھپک کر بند ہوجانا،کسی شدید گرم یا تیزدھار والی چیز پر ہاتھ کالگتے ہی فوراً پیچھے کھنچ جانا اور کسی لذیذ کھانےکو دیکھ کر منہ میں پانی بھر آنا وغیرہ۔ اس قسم کے افعال اپنے مخصوص محرکات سے مشروط ہوتے ہیں۔

فاعلانہ کردار وہ کردار ہوتاہے جو انسان کے خارجی ماحول پر عمل کرکے کچھ نتائج پیداکرتاہے۔مفعولانہ کردار کے برعکس اس کردار کے محرکات خارجی ماحول میں واضح نہیں ہوتے اوریہ کردار اپنے نتائج کے تحت  ہوتاہے۔ اس کی مثالوں میں کتاب پڑھنا، گاڑی چلانا اورخط لکھنا وغیرہ شامل ہیں۔فاعلانہ کردار جس قسم کے نتائج سے مشروط ہوتاہے، ان میں سب سے اہم خارجی ماحول سے حاصل ہونے والی تائید یا تقویت (Reinforcement) ہے۔سکنر کے مطابق اگر کسی فعل کو خارجی ماحول سے تقویت حاصل ہوجائے تو وہ فعل یا رویہ مستحکم ہوجاتاہے جس سے اس بات کاامکان بڑھ جاتاہے کہ وہ کردار دوبارہ بھی انہی شرائط کے تحت دہرایا جائے گا مثلاً اگر آپ کسی تقریب میں کوئی نیا لباس پہن کر جائیں اوروہاں لوگ آپ کے اس لباس کی تعریف کریں تو ا س حوصلہ افزائی کی بنیاد پر آپ آئندہ بھی تقریبات میں یہی لباس پہن کر جائیں گے یا اگر کسی محنتی طالب علم کو امتحان میں کامیابی پر تعریفی کلمات یا انعام حاصل ہو تو وہ طالب علم اپنی محنت سے پڑھنے کے رویے کو آئندہ بھی جاری رکھے گا۔ اس طرح مسلسل تقویت اورحوصلہ افزائی کی وجہ سے کوئی کردار کی رویہ "عادت" کی شکل اختیار کرکے انسان کی عمومی شخصیت کاحصہ بن جاتاہے۔دوسری طرف اگرانسان کاکوئی فاعلانہ کردار خارجی ماحول سے تقویت حاصل کرنے میں مسلسل ناکامی سے دوچار ہو تو اس صورت میں وہ کردار ضعف کاشکار ہوکر متروک ہوجاتاہے۔سکنر نے اس عمل کو کسی چراغ کے بتدریج گُل ہوجانے سے تشبیہ دی ہے۔مثال کے طورپر اگر بچے کے رونے اورچیخنے کے باوجود ماں اس کی طرف متوجہ نہ ہو توبچہ کچھ دیر بعد خودبخود خاموش ہوجاتاہے۔اسی طرح ہماری وہ عادات اوررویے خودبخود ترک ہوجاتے ہیں جنھیں دوسروں کی طرف سے قبولیت یا توجہ حاصل نہیں ہوتی ۔ پس ہمارے فاعلانہ کردار کے جاری رہنے یا متروک ہوجانے کاانحصار خارجی ماحول سے ملنے والی تقویت پر ہے۔ یہ تقویت اگر تعریف،انعام اور توجہ کی شکل میں ہو تو اسے مثبت تقویت اور اگر سزا،ناپسندیدگی اور عدم توجہ کی شکل میں ہو تو اسے منفی تقویت کہتے ہیں۔

خودتقویتی کے دو اصول

ماہرنفسیات گولڈائمنڈ(Goldiamond) نے خودتقویتی کے دو اصول بیان کیے ہیں:

1)سب سے پہلے آپ کو اس حقیقت کاادراک کرنا ہوگا کہ آپ کے تمام افعال اوررویوں کا اصل محرک آپ کی ذات کے اندر نہیں بلکہ خارجی ماحول میں ہے۔ کرداریت پسند ماہرین(Behaviorists) انسانی ارادہ و اختیار کے بہت زیادہ قائل نہیں ہیں۔خود انضباطی یعنی سیلف کنٹرول کامطلب ان کے نزدیک قوتِ ارادی کامظاہرہ نہیں بلکہ خارجی ماحول میں پائے جانے والے محرکات کو ازسرِ نو اس طرح ترتیب دینا ہے کہ ان کے زیراثر ناپسندیدہ رویوں کی بجائے مطلونہ افعال سرزد ہوں۔اگر ایک شخص کوشش کے باوجود اپنےناپسندیدہ کردار اورمنفی عادات پرقابو پانے میں ناکام رہتاہے تواس کامطلب یہ نہیں لینا چاہیئے کہ اس شخص کی قوتِ ارادی کمزور ہے بلکہ اس مطلب یہ ہوگا کہ اس شخص  کے منفی کردارکو اس کے خارجی ماحول سے مسلسل کسی نہ کسی صورت میں مثبت یا منفی تقویت پہنچ رہی ہےجس کی وجہ سےوہ شخص نہ چاہتے ہوئے بھی ان ناپسندیدہ عادات واطوار کوجاری رکھے ہوئے ہے۔لہٰذا خارجی محرکات کو تبدیل کیے بغیر محض ارادے کے بل بوتے پر اپنے کردارپر قابوپانے کی کوشش بے سود ہوگی۔مثلاًاگر آپ کامسئلہ سگریٹ نوشی ہے اورآپ ارادہ کرتے ہیں کہ آئندہ سگریٹ کو ہاتھ نہیں لگائیں گے تو اس کوشش میں آپ کو عارضی کامیابی ہی ہوگی ، کیونکہ سگریٹ نوشی کے اصل اسباب بدستور خارجی ماحول میں موجود ہیں۔نتیجتاًآپ کچھ دنوں تک اپنے آپ کے ساتھ لڑیں گے اورپھر سگریٹ کی طلب کے آگے ہتھیار ڈال دیں گے۔پس اس بات کو ذہن نشین کرنا ضروری ہے کہ اگرچہ ہمارا مقصد خود انضباطی ہے مگر ہمیں اصل کام خارجی اسباب وعوامل پر کرناہے۔

2) اس کے بعد آپ کو اپنی ناپسندیدہ عادت اورناقابل اصلاح کردار کاایک عملی تجزیہ کرنا ہوگا۔عملی تجزیے سے مراد ہےکہ آپ دیکھیں کہ:

                  i.            آپ کی ناپسندیدہ عادت یا کردار کے آپ کے ماحول میں اصل اسباب ومحرکات کیا ہیں مثلاً اگر خودلذتی کی عادت کاشکار ہیں توآپ کوغور کرنا ہوگا کہ کون سا خارجی محرک آپ سے اس فعل کاارتکاب کرواتاہے؟ ممکن ہے کہ اس کا سبب وہ فحش فلمیں ہوں جو آپ دوستوں کے ہمراہ دیکھتے ہیں یا وہ رسالے اورڈائجسٹ ہوں جو منفی ترغیبات پر مبنی ہوتے ہیں۔اس کے علاوہ ہوسکتاہے کہ جذباتی انتشار اس کا اصل سبب ہو یا پھر بے مقصدیت،فراغت اورکسی مناسب مشغلے کانہ ہونا آپ کو اس فعل کاعادی بنائے ہوئے ہو۔

               ii.            کن اوقات اورکن مقامات پرآپ زیادہ تر اپنے ناپسندیدہ کردار کاارتکاب کرتے ہیں مثلاً اگرسگریٹ نوشی میں مبتلاہیں تو ممکن ہے کہ آپ دوسروں کو سگریٹ پیتے دیکھ کر اس کی تحریک محسوس کرتے ہوں یا پھر کھانے کےبعد،مصروفیت کے دوران یاسوچ بچار کےوقت آپ سگریٹ کی زیادہ طلب محسوس کرتےہیں۔

خودتقویتی کاطریقۂ کار

سکنرکے بیان کردہ تقویت کے اصول کی مدد سے آپ اپنےکردار کی اصلاح مندرجہ ذیل طریقوں سے کرسکتے ہیں:

1) اپنے انضباطی رویے کے ساتھ کوئی مثبت تقویتی عامل (Positive Reinforcer) مثلاً انعام، تعریف وغیرہ مشروط کریں۔مثال کے طورپر اگرآپ اپنی سگریٹ نوشی کی عادت بتدریج ختم کرنے کیلئے روزانہ دوسے زیادہ سگریٹ نہ پینے کافیصلہ کرتےہیں تودن کے اختتام پر جب آپ نے کامیابی کے ساتھ سگریٹ کی طلب کامقابلہ کیاہو،تو خود کو کوئی انعام دیں مثلاً چائے کااضافی کپ،کوئی سویٹ ڈش وغیرہ۔اسی طرح جب آپ ایک مکمل ہفتہ کامیابی کے ساتھ اپنی عادت پر قابو رکھتے ہوئے گزار لیں تو ہفتے کے اختتام پرخود کوئی زیادہ بڑا انعام دیں مثلاً  کسی پسندیدہ ناول کامطالعہ،کوئی دلچسپ فلم،من پسند موسیقی وغیرہ۔مگر ناکامی کی صورت میں خود کو ان چیزوں کامستحق نہ سمجھیں۔اسی طرح جب آپ پوراایک ماہ اس طرح ختم کریں کہ آپ نے اپنے فیصلے کے مطابق روزانہ دو سگریٹوں سے زیادہ تمباکو نوشی نہ کی  تو مہینے کے اختتام پر خود اپنے اعزاز میں ایک شاندار ضیافت دیں۔ا س کیلئے ایک پورادن مختص کرکے خود کو بھرپور تفریح بہم پہنچائیں مثلاًدوست احباب کے ساتھ سیروتفریح کاپروگرام بنائیں،سینما پر جاکر کوئی نئی فلم دیکھیں،کسی ضخیم ناول کامطالعہ کریں، اس دن اپنی من پسند ڈش بنوائیں وغیرہ۔لیکن اگر کسی مرحلے پر آپ زیادہ سگریٹ نوشی کے مرتکب ہوگئے ہوں توخود کو ان تفریحات سے محروم رکھیں۔

                                                                                                             اس کے علاوہ مثبت تقویت کاایک طریقہ اور بھی ہے کہ اپنی بری عادت کے کامیاب ضبط پر آپ خود اپنی تعریف کریں یا اپنے دوستوں اورشریکِ حیات سے اس بات کاذکر کریں کہ آپ نے پورا ایک ماہ دو سے زائد سگریٹ نہیں پیے ہیں۔اس پر یقیناً وہ آپ کی تحسین کریں گے جس سے آپ کی حوصلہ افزائی ہوگی  اور آپ کی قوتِ انضباط (سیلف کنٹرول )میں اضافہ ہوگا۔

2) اپنی ترقی و اصلاح کاجائزہ لینے کیلئے ایک چارٹ یا گراف بنائیں مثلاً اگر آپ اپنی بسیارخوری پر قابو پاکر اپنے وزن میں کمی کررہے ہیں تو اپنے وزن میں ہونے والی ہفتہ وار کمی (پاؤنڈز میں) چارٹ میں لکھتے جائیں۔اس طرح آپ اپنی اس ترقی کوآنکھوں سے دیکھ سکیں گے جسے آپ محسوس نہیں کرسکتے۔یہ چیز آپ کےلئے فوری تقویت کاباعث  ہوگی ۔قابل  ِ اصلاح کردارکی نوعیت کے مطابق آپ یہ طریقہ بھی اختیار کرسکتے ہیں کہ اپنے ٹیبل کیلنڈر کی ان تاریخوں پرکراس کے نشان لگاتے جائیں جن تاریخوں  میں آپ  اپنی بری عادت  کے ارتکاب سے بچتے رہے ہوں۔اس طرح نشان زدہ تاریخوں کی بڑھتی ہوئی تعداد آپ کی مسلسل کامیابی کو ظاہر کرے گی اورروزانہ کیلنڈر پر نظر ڈالنا آپ کو مثبت تقویت فراہم کیا کرے گا۔اس سلسلے میں آپ پوائنٹ سسٹم سے بھی مدد لے سکتے ہیں۔یعنی ہر اس موقع پر جب آپ  اپنے ناپسندیدہ رویے کو ظہور میں آنے سے روک لیں،خود کو ایک پوائنٹ دیں اوراس طرح پوائنٹس کی صورت میں ایک ریکارڈ بناتے  جائیں۔

3) جب آپ پختہ عہد کے باوجود اپنی ناپسندیدہ عادت یارویہ کے مرتکب ہوجائیں تواپنے لیے کوئی سزا مقرر کریں مثلاً روزمرہ کےکام کا دورانیہ بڑھادیں،نصابی کتب کااضافی مطالعہ کریں یا اسی طرح کے دیگر کام جنھیں آپ مشکل اورناگوار خیال کرتے ہوں۔اس سلسلے میں خود پر جرمانہ عائد کرنے کی تدبیر زیادہ موثر ثابت ہوتی ہے مثلاً ایک عورت نے محسوس کیاکہ اسے گفتگو کے دوران بات بات پر قہقہہ لگانے کی عادت پڑگئی ہے۔اس نے فیصلہ کیا کہ آئندہ جب بھی وہ اس طرح غیر ضروری طورپر قہقہہ لگائے گی تواپنے شوہر کی طرف سے ہرہفتے ملنے والی رقم میں سے ایک ڈالر کسی علیٰحدہ تجوری میں رکھ دیا کرے گی اورمہینے کے اختتام پر یہ جتنی کچھ بھی رقم ہوجایا کرے گی ،اسے ذات پرخرچ کرنے کی بجائے کسی فلاحی ادارے میں جمع کرادیا کرے گی۔اس تدبیر سے اس عورت کی یہ ناپسندیدہ عادت چند ماہ میں غائب ہوگئی۔

4) اعراض (Avoidance) کے اصول کےمطابق خود کو ان تمام محرکات اورترغیبات سے دور رکھیں جن کے زیر اثرآپ سے منفی رویے سرزد ہوتےہیں۔ مثلاً  تمباکونوشی کی صورت  میں خودکو تمباکو نوش حضرات کی صحبت سے دور رکھیں ،جیب میں سگریٹ نہ رکھیں، منفی ترغیب کو مثبت ترغیب  میں بدل دیں مثلاً جب سگریٹ کی طلب ہو تو کسی دوسری دلچسپ سرگرمی میں مشغول ہوجائیں وغیرہ۔

                                                                                                                                                         اسی طرح بسیارخوری کی صورت میں ان ریستورانوں میں جانے سے گریز کریں جن کے کھانے لذیذ ہونے کی وجہ سے آپ زیادہ کھاجاتے ہیں، ان تقریبات میں جانے سے بھی پرہیزکریں جن میں زیادہ کھانے کی حوصلہ افزائی کی جاتی ہو،گھر کے ریفریجریٹر کو بھی بلا ضرورت کھول کر دیکھنے سے بچیں ،وغیرہ۔

5) ان تمام فوائد کی ایک فہرست تیارکریں جو آپ کی ناپسندیدہ عادات یا کردارکے خاتمے سے حاصل ہوں گے۔مثلاً وزن میں کمی کی صورت میں پرکشش اورسڈول جسم،چستی اورقوتِ کار میں اضافہ ،سماجی مقبولیت میں اضافہ وغیرہ۔اس فہرست کو کسی ایسی جگہ چسپاں کردیں جہاں آپ اسے روزانہ دیکھ سکیں۔یہ فہرست بسیارخوری پر قابو پانے کے لیے ایک تحریک کاکام دے گی۔

6) جدید طب بعض ایسی ادویات تیارکرچکی ہے  جن سےمنفی رجحانات اورکردار پر قابو پانےمیں مدد ملتی ہے۔مثلاً مانع اضمحلال (Anti-depressants) کے ذریعے مایوسی ،خوف،تخریبی اورخودکشی کے رجحانات کوکم کیاجاتاہے۔اسی طرح تقریر کے خوف کے شکار افراد کو بیٹا بلاکرز نامی ادویات کھلائی جاتی ہیں جن سے قلب کی رفتار اوربعض غدودوں کی تحریک معتدل رہتی ہے جس کی وجہ سے خوف اورگھبراہٹ کی کیفیات لاحق نہیں ہوتیں۔ تمباکونوشی کی عادت ختم کرنے کیلئے بھی معاون ادویات بھی دستیاب ہیں تاہم ادویات کے سلسلے میں اپنے معالج سے مشورہ مناسب ہوتاہے۔

٭٭٭٭٭٭٭٭٭٭٭٭٭٭٭٭٭٭٭