جذبات کی تنظیم

جذبات کی تنظیم 

اقتصادیاتِ جذبات

                                                                                                                                                       علمِ عضویات کا ایک اصول ہے کہ عضو کے استعمال سے عضو قو ی ہوتاہے۔مثال کےطور پر جو لوگ داہنے ہاتھ کو زیادہ استعمال کرتے ہیں،ان کا دایاں ہاتھ بائیں ہاتھ کی نسبت زیادہ مضبوط اور توانا ہوتاہے۔جو لوگ زیادہ دماغی کام کرتے ہیں ،ان میں مسائل حل کرنے کی صلاحیت جسمانی کام کرنے والوں کی نسبت زیادہ ہوتی ہے۔پیدل چلنے والے افراد میں ٹانگوں اور پیروں کی ہڈیاں اور عضلات گاڑیوں میں سفر کرنے والے افراد کے مقابلے میں زیادہ قوی ہوتے ہیں۔یعنی جس عضو کو بھی زیادہ استعمال کیا جائے گا،وہ طاقتور اور زیادہ فعال ہوجائے گا۔

                                                                                                                                                                      تاہم عضویات کے برعکس،جذبات کا اصول یہ ہے کہ جذبوں کے استعمال سے جذبے کمزور ہوجاتے ہیں۔مثلاً کسی کہانی کو بار بار پڑھنے سے اس میں دلچسپی ختم ہوجاتی ہے۔کسی نغمے کو مسلسل سنتے رہنے سے اس کی رعنائی غائب ہو جاتی ہے۔کسی اشتعال انگیز بات پر ابتدا میں جتنا غصہ آتا ہے،وہ بعد میں اسے مزید سوچ سوچ کر نہیں آتا۔کسی ناخوشگوار واقعے پر شروع میں جیسی کوفت اور جھنجلاہٹ محسوس ہوتی ہے ،وہ کچھ دنوں بعد اس واقعے کی یاد میں مفقود ہوتی ہے۔اگر کوئی خوفزدہ کردینے والی چیز بار بار انسان کی آنکھوں کےسامنے لائی جاتی رہے،تو رفتہ رفتہ اس شے کا خوف کم ہوجاتاہے۔محبت یا نفرت کا مسلسل برتاؤ یا اظہار ان جذبات کی شدت کم کردیتاہے۔

                                                                                                                                                 جذبات کی مثال پانی کے بورکی طرح ہوتی ہے۔موٹر کے ذریعے پانی کھینچنے سے بور میں پانی کی سطح گرجاتی ہے۔کچھ وقفے کے بعد بور میں دوبارہ پانی کی سطح بلندہوجاتی ہے۔اسی طرح دلچسپی،غصہ، خوف، محبت اور نفرت جیسے جذبات بھی  مسلسل رہنے سےکمزور پڑ جاتے ہیں ۔اگر ان میں وقفہ آجائے تو یہ پھر سے بھر پور انداز میں ابھر آتےہیں۔اگر آپ کسی دلچسپ فلم کو ایک عرصے بعد دوبارہ دیکھیں تو وہی پہلے کا سا لطف آتا ہے۔محبت کے بارے میں اسی لیے کہا جاتاہے کہ جدائی محبت کی آگ کو بھڑکا دیتی ہے۔غصے اور نفرت کے جذبات بھی کچھ وقت دبے رہنے کے بعد کسی تحریک سے دوبارہ جاگ اٹھتے ہیں۔

                                                                                                                                  اس سے ظاہر ہوتاہے کہ شعوری سطح پر جذباتی توانائی محدود مقدارمیں دستیاب ہوتی ہے۔اس لیے انسان کو جذبات کے معاملے میں "بچت" اور "کھپت" کے یہ اصول اختیار کرنے چاہیئں:

1) خوشگوار اور پسندیدہ جذبات کے لیے بچت سے کام لیتے ہوئےان میں وقفہ دینا چاہیے۔اگر آپ چاہتے    ہیں کہ ایک دلچسپ ناول ہمیشہ آپ کیلئے دلچسپ ہی رہےتو اسےمہینوں یا برسوں کا وقفہ دے کر  پڑھیں۔جدائی عارضی ہو تو یہ محبت کو برقرار رکھنے میں معاون ہوتی ہے۔

2) غصہ ،خوف اور نفرت جیسے منفی اور ناخوشگوار جذبات کو ایک وقت میں زیادہ سے زیادہ استعمال کرنے کی کوشش کرنی چاہیئے۔اگر آپ کو کسی بات پر غصہ آتاہے تو اپنا ذہن اس بات سے ہٹانے کی کوشش نہ کریں بلکہ اس بات کو زیادہ سے زیادہ ذہن میں لا کر اس جذباتی توانائی ختم کردیں۔اگر کسی بات کا خوف یا اندیشہ لاحق ہے توفرار کی بجائے اس کازیادہ سے زیادہ وقت کیلئے سامنا کریں تاوقتیکہ ان جذبات کی ساری توانائی خرچ ہوجائے اور آپ پرسکون ہو جائیں۔

                                                                                                                                                                                          ہر جذبے،خواہ وہ مثبت ہویا منفی، کو اپنے اظہارکیلئے توانائی چاہیئےہوتی ہے اور یہ لامحدود نہیں ہوتی۔اس لیے مثبت جذبات کی توانائی بچاکر اور منفی جذبات کی توانائی کو خرچ کرکے آپ اپنے جذبات کا بھی اسی طرح انتظام کر سکتےہیں جس طرح ایک محدود ماہانہ آمدن کو گھریلو بجٹ کے ذریعے صرف کیاجاتاہے۔

جب جذبا ت مسئلہ بن جائیں۔۔۔

                                                                                                                                                      جذبات ہماری زندگی کا ایک اہم حصہ ہیں ، لیکن بعض اوقات یہ ہمارے لیے مسئلہ بھی بن جاتے ہیں۔ عملی زندگی میں ہر شخص ایسے مواقع سے گزرتاہے کہ جب شعوری ارادے اورفیصلے دھرے کے دھرے رہ جاتے ہیں اور ہم جذبات کی گرفت میں آجاتےہیں۔ناکامیاں، صدمے، معاشی اتارچڑھاؤ، تلخ کلامیاں ، دوستوں کاتوقعات پر پورانہ اترنا، ازدواجی الجھنیں وغیرہ جیسے عوامل ہمارے اندر منفی جذبات کا ایک سلسلہ چلادیتے ہیں جس کے آگے ہم بالکل بے بس ہوجاتے ہیں۔جذبات کے ہاتھوں بسااوقات ہماری پوری شخصیت داؤ پر لگ جاتی ہے حتی ٰ کہ محبت اورخوشی  جیسے مثبت جذبات بھی قابو سے باہر ہوکر ہمیں نقصان پہنچاتے ہیں۔

اعتدال کی حالت میں جذبات ہمیں کچھ ضرر نہیں پہنچاتے، بلکہ یہ ایک لحاظ سے مفید اور ضروری ہوتے ہیں۔ مثال کے طور پر خوف اور بے چینی کے جذبات ہمیں محتاط بناتےہیں، تشویش کے جذبات ہمیں اصلاح ِ احوال کی طرف متوجہ کرتےہیں ، دل شکستگی اور محرومی کے جذبات خود انحصاری کی خواہش پیداکرتےہیں وغیرہ۔

                                                                                                                          کیا جذبات پر قابو پایا جاسکتاہے؟ جی ہاں، کوشش اورمسلسل مشق ایسا ممکن ہے۔البتہ جذبات کو مکمل طورپر کچل دینا ممکن نہیں۔بعض اوقات ایساکرنا مضر ہوتاہے مثلاً کسی عزیز کی وفات پر غم کے جذبات کو دبادینا مستقل افسردگی کاباعث بن سکتاہے۔

                                                                                                                                   نیچے چند چٹکلے یا گُر دیے جارہے ہیں جو منفی جذباتی کیفیات میں خودکو قابو میں رکھنے میں معاون ہوتےہیں:

1) پریشان کن جذبات  کی ایک وجہ آپ کے جسم کا اضطراری ردعمل ہوتاہے۔ مثلاً پسینے کا اخراج، تیز دھڑکن، کپکپاہٹ، ہاضمے کاسست پڑجانا وغیرہ۔ ایسی تبدیلیوں پر آپ کاکچھ اختیار نہیں ہوسکتا۔ ان کی نہ تو کوئی ذمہ داری محسوس کریں  اور نہ ان کے حوالے سے نادم ہی ہوں۔یہ ایک قدرتی اور جبلی عمل ہے۔

2) اس بات کو قبول کیجیے کہ کسی پریشان کن واقعے سے نہ تو ہمارے جذبات بالکل غیر متاثر رہ سکتےہیں اورفوراًبحال ہوسکتےہیں۔جذبات کاحملہ بھی انفیکشنز کی طرح ہوتاہے جو اپنی مدت پوری کرکے ہی جاں چھوڑتے ہیں۔ ان ناخوشگوار جذبات کو یہ سوچ کر پی جائیے کہ ”ایسے تجربے کے بعد میراپریشان ہوجانا بالکل فطری ہے ۔ میری جگہ کوئی دوسرا بھی اسی طرح رنجیدہ ہوتا۔“ تاہم ایسے جذبات خود پر غالب نہ آنے دیجیے۔

3) جس رویے اور طرزِ عمل کو آپ معقول اورمفید خیال کرتےہوں، اس پر خود کو پوری قوتِ ارادی کے ساتھ قائم رکھیے خواہ آپ کے جذبات آپ کاساتھ نہ بھی دیں۔ مزاحم جذبات کے باوجود اپنے فیصلے پر ڈٹے رہنا دراصل ایک اعصابی ورزش ہے جس میں بلاشبہ آغاز میں آپ کو دشواری پیش آئے گی، لیکن مسلسل مداومت سے ایساکرنا آپ کیلئے سہل ہوتا جائے گا۔

4) جذباتی بحران کے دوران مسائل کے تدارک کیلئے ایسی تدابیر اختیا ر کیجیے جو مجرب اورآزمودہ ہوں اور جن کا آپ ماضی میں کامیاب تجربہ کرچکے ہوں۔ نئی تدبیروں اورطریقوں کوآزمانے کاخطرہ مو ل نہ لیجیے کیونکہ ہنگامی اوراضطراری حالات میں ان کی کامیابی کاامکان کم ہوگا۔

5) اضطراب اورپریشانی  کے لمحات میں بعض اوقات کچھ نہ کرنا ہی بہتر ہوتاہے۔ الٹے سیدھے قدم اٹھانا مسائل میں اضافے کا باعث بن سکتاہے۔ خود کوپرسکون اورقابو میں رکھ کر اچھے حالات کاانتظار کرنا بھی ایک تدبیر ہے۔

٭٭٭٭٭٭٭٭٭٭٭٭٭٭٭٭٭